Mipui hmuha 'game' khêla inhnialna

March 6, 2026 khan Assembly House-ah Indian Air Force (IAF) tana Lengpui leh Sihphir ram lak chungchangah private member resolution sawiho a ni a; resolution hi opposition MLA put luh ni mah se, tihdanglam hret a nih hnuah pawm (pass) a ni.

Resolution pass tâk kha a tirah chuan IAF tana Lengpui ram lak dan CBI chhuitir tura Mizoram sorkar karna a ni. Mahse, sorkarin CBI hnenah chhui phalna (consent) a pek tawh si avangin, CBI-in an chhui chhuah thuai theih nan chak taka bawhzui tura sorkarin nawrna anga siamrem a nih hnuah pawm a ni ta a ni.

IAF tana ram lak chungchangah CBI leh hmun dangah complaint a lut tawh a, Mizoram sorkar pawhin CBI-in an chhui theih nan 'consent' a pe tawh. Hei vang hian, a nihna takah chuan IAF tana ram lak dan CBI chhuitir tura phûtna resolution Assembly House-a sawiho kha ṭul tawh loah a ngaih theih.

Resolution thehluh laiin CBI hnenah consent pek a la ni lo a, chuvang chuan, resolution thehluh kha a àwm em em. House-a sawiho hun erawh CBI hnena consent pek tawh hnu a ni a, chuvang chuan CBI chhuitir tura phûtna resolution siam a ṭul tawh loah a ngaih theih; resolution thehluttu pawhin a duh chuan a hnûkdâwk (withdraw) thei a ni.

Mahse, CBI chhuitir leh chhuitir loh lam ai mahin, mipuia mithmuha 'game' khelh vang zawkin sawiho a ṭul an ti tlat niin a hriat. An inhnial vak vak a, party dang mipuiin an rinhlelh theih nan inhnamhnawih ni àwm takin an inpuh kual vel a ni ber. AMC inthlan a hnai a, chumi thlir chuan party ṭhenkhat chuan political ball-ah an hmang lui tlat niin a lang.

Assembly House-a inhnialnate khan CBI-in an chhui leh chhui loh emaw, a chhui dan turah emaw awmzia a nei lêm lo. Political parte-te'n CBI chhuitir an duh a, Mizoram mipuiin pawhin an duh. CBI-in an chhui a nih chuan a lawmawm ang a, an chhui theih nan sorkarin bawhzui tur a nei a nih chuan chak takin bawhzui rawh se.

IAF tana ram lak chungchang CBI-in an chhui a nih a, thil dik lo ti an awm a nih chuan an chhui chhuak mai ang; sorkarin consent a pe tawh bawk a, inpuh kual vel hi ṭul lo leh awmze nei lo a ni tawh.