Thupui hre reng chungin kût ila

Mizo kût pui ber Chapchàr Kût a hnai leh ta a, naktuk mai hian Mizoram hmun hrang hrangah hman a ni dawn. Aizawlah chuan tun kar tìr, March 9 aṭang khan Chapchàr Kût pualin thil chi hrang hrang buatsaih a ni a; sorkarin a hnathawkte chu an hnathawhna hmunah tun kar chhungin Mizo hnam thuam inbel turin a chah.

Chapchàr Kût pual hian March 9, 2026 aṭangin Lammual chhak tlangah 'Handloom, Textiles & Handicrafts Exhibition and Food Processing and Food Court' buatsaih a ni a, March 10 aṭangin Aijal Club Park-ah Flower Show ṭan a ni. March 11 aṭangin Vanapa Hall-ah Art & Photo Exhibition buatsaih ṭan a ni bawk.

Kûtah hian hman khat daih sarâng (single use plastic) lam chi hmang lo turin sorkar lam chuan mipui an ngen a; hei hi mipuite'n zâwm thei ila a duhawm. Bawlhhlawh siam tam lo zawnga khawsak te, bawlhhlawh kan neih, a bikin ṭawih thei lote kalsan mai loh te hi Mizo mipuiin kan zir a, chìn ṭhana kan neih a hun tawh hle.

Chapchar Kût hi zu emaw rûi awm loa hman beisei chi a ni lo a, rûi tâwk an awm zelin a rinawm. Rûi an awm ang a, mahse, mi dang tana ninawm, chimawm leh hnawksak zawnga chêtna erawh awm lo thei se duhthusam a ni.

Mi a ruih tawh chuan a inthunun zo lo fo a, mi dang tana ninawm leh hnawksak nih duh bik lo mah se, an inthunun zawh loh avangin an chimawm a, an hnawk fo. Chuvangin, thuneitu, venhim hna thawktute'n an vil ṭhat a ṭul a, mi dang tana chimawm leh hnawksak, mi tibuai leh buaina siam an awm a nih chuan dah hran mai zel ni se a ṭha ber ang.

Kumina Chapchàr Kût thupui 'Zo nun ze mawi–Inremna' tih a ni a, thupui hre reng hian mipuite'n kut hmang vek thei ila a duhawm. Kût thupui hi mi tinin kan nun ṭheuhah seng lut ila, chhungkua leh khawtlangah lan chhuahtir tum ila; puipunna hmuna mi dang rem thiam nih pawh mi tinin kan tuma kan zir a ṭul.

Mizote kût pui ber Chapchàr Kût hi mi dangte rem duhna thinlung pu chungin hlim tak leh thianghlim takin hman tum ṭheuh ila, kût hlawhtling tak a ni ngei ang.