Aikal late ûm zui zel ni rawh se

Department of Personnel and Administrative Reforms (DPAR) Minister chuan Mizoram Assembly budget session neih mekah March 3, 2026 khan aikal lâk vangin sorkar department paruka thawk mi 37 hrem an nih tawh thu a sawi.

DPAR Minister sawi danin, sorkarah aikal lak a tawp theih nan sorkarin nasa takin hma a la a, aikal late chu a ṭul angin hrem an ni. Aikal la mi 29 chawlhtir an ni tawh a, zilhhauh leh warning pek pariat an awm bawk.

Tuna Mizoram sorkar ding mek hian sorkar hnathawk aikal late a ngaimawh a, titawp turin thuneihna an chan tirh aṭangin hma an la a ni. Sorkar duh dan hi sorkar department-a hotute pawhin an bawhzui tih a chiang a, a lawmawm. Dan bawhchhia leh sorkar duh dan palzûta aikal la lui zelte sorkarin a hrem zui ta pawh hi a lawmawm a; Mizoram kal zel turah rah ṭha zawk a chhuah ngei a rinawm.

Mizoram sorkarah hun rei tak chhung aikal la an awm tawh a, sorkar kal tawhte'n ngaimawh lo emaw, an ngaimawh ngam lo emaw a nih hmel a, tihtawp tum loin an enliam mai zel niin a lang. Hei hian sorkar hnathawkteah inthlahdahna leh dan pawisak lohna a hring a; a pawi hle.

Sorkar hnathawk aikalte hi sorkar hnathawk an ni lo a, chutihlaiin, aikal zingah sorkar thurûk hria an awm foin a rinawm a; sorkar leh a hnathawkte chauh hriat tur chi sorkar hnathawk dik tak ni ve loin an lo hre ve thei ṭhin hi a ṭha lo hle. Aikal lâk hian India Danpui a bawhchhiat bakah, dik taka hna zawngte hmakhua a dâl bawk.

Sorkar hnathawk zingah taksa hrisel lohna leh harsatna lian tak vanga hna thawk thei lo tan aikal lak a ṭul anga ngai an awm ṭhin; hei hi ngaihdan kal sual a ni. Loh theih loha aikal lâk ngai a awm theih loh a, mahni hna thawk thei ngang lote tan sorkarin Mizoram Special Voluntary Retirement Scheme ṭha tak a siam a ni.

Sorkar hnathawk zingah aikal la ru an awm leh awm loh sorkar hian fîr takin en zui zel se, aikal lak a tawp tak tak theih nan theihtawp chhuah zui zel rawh se. Department leh pisaa hotute pawhin sorkar dan leh duh dan hi ṭha tak leh dik taka an bawhzui bawk se, an department/pisaa aikal late an hum tur a ni lo.