8th Schedule-a Mizo ṭawng telh

Mizoram Legislative Assembly session neih mekah March 9, 2026 khan Education Minister official resolution, 'Eighth Schedule of the Constitution of India-ah Mizo ṭawng hi telh tura hmalak ni rawh se' tih chu sawiho a nih hnuah pawm a ni.

India Danpui 8th Schedule-ah Mizo ṭawng telh a nih theihna tura Assembly House-in hmalak a rêl hi Mizo hnam huap zo pawl Central YMA chuan lawmawm an tih thu an puang a, "8th Schedule-a Mizo ṭawng telh ve a nih theih nan CYMA chuan theihtawp a chhuah zel dawn a ni," an ti.

Mizoram Literature and Language Teachers' Academy pawhin Assembly resolution chu lawmawm an tih thu leh, resolution chuan 8th Schedule-a Mizo ṭawng telh ve tura dilna leh ngenna awm mek chak lehzuala a nawr theih ngei an beisei thu an tarlang.

Hetihlai hian, MZP leh Joint Hnampual Students' Organisation te chuan, 8th Schedule-a Mizo ṭawng dah chu pawmpuina an neih loh thu March 9, 2026 khan an puang thung a; Mizo Language Development Board hnuaia Eight Schedule Study Group nen an inkawmnaah 8th Schedule-a Mizo ṭawng dah an pawmpui thu an sawi lo niin an sawi.

Kum eng emawti kal ta aṭang khan Indian Constitution 8th Schedule-a Mizo ṭawng telh a nih theih nan pawl ṭhenkhat chuan hma an lo la tawh a, mahse, tun thlengin telh a la ni lo. Telh la ni lo mah se, hmalakna a la kal reng a; tunah pawh sorkarin hmalak tumin Assembly House-ah meuh thutlukna a siam ta a ni.

Thil rêng rêng hian ṭhatna leh ṭhat lohna a nei fo a, thutlukna siam dawnin a ṭhatna leh ṭhat lohna bûk a ngai ṭhin. Mipui náwlpui nghawng thei thilah phei chuan mipui ngaihdan lak a ṭul cháng a awm.

8th Schedule-a Mizo ṭawng telh chungchangah pawh, a ṭhatna leh ṭhat lohna a awm ngei ang. Pawl leh mipui ngaihdan thlirin, 8th Schedule-a Mizo ṭawng telh a ṭhatna leh hlâwkna awm turte hi a ṭhat lohna nia sawite aiin a bûk rit zawk a, Mizoram mipui zingah pawh telh duh an tam zawk niin a lang.

Mizoram mipui sûkthlêk thlirin, mi tam zawkin 8th Schedule-a Mizo ṭawng telh ṭha an ti nia a lan avangin, telh a nih theih nan Mizoram sorkar hian resolution a pawm thar hi chak takin bawhzui rawh se.