Chhiah pek dan enfiah zel ni rawh se

Taxation Enforcement Wing chuan tun hnai khan Mizorama private coaching institute leh private tuition centre te an endik a; GST registration an neih leh neih loh te, coaching course an pek te, coaching fee leh zirlai neih zat te an endiknaah hian Goods & Services Tax (GST) an pe mumal lo tih an hmu chhuak.

Mizorama coaching institute-te chu an sum lak luh aṭanga chhûtin GST pe pha deuh vek an ni a; chutih laiin, GST-ah institution/centre pahnih khat chiah an inziak lut a, GST registration nei chhunte pawhin chhiah an pe mumal lo tih hmuh chhuah a ni.

Mizoram GST Act, 2017 hnuaiah private coaching/tuition centre-te'n sum an lak luh tam dan azirin chhiah (GST) an pek luh a ngai a; zirna tluang pangngai - private school leh college te erawh chu GST an âwl theia sawi a ni thung.

Taxation-a thawkte'n private coaching/tuition institute-te an endik hi a ṭha a, GST-a inziak lut ngei tur inziak lut si lo an hmu chhuak te, chhiah àwl ru reng an hmu chhuak te hi a lawmawm. An hmu chhuak ta sa sa, GST an pek ngei theih nan Taxation hian bawhzui zel se, chhiah an pek ngei theih nan hma la zui rawh se.

Chhiah pe turte'n chhiah an pek vek theih nan sorkar hian nasa lehzuala hma a lak a ṭul a; Taxation hian coaching/tuition institute-te mai ni loin, sumdawnna hmun dangte pawh endik zel rawh se. Chhiah pe tur dik takte'n an pek vek chuan sorkar sum lak luh a pung ang a, sum lama sorkar harsatna pawh a ziaawm phah ngei ang.

Sumdawnna hmunte kim tak leh uluk taka endik tur chuan thawktu lam an indaih a ṭulin a rinawm a, Taxation hi thawktu an indah zawk theih nan sorkarin a ngaihven lehzuala ṭul.

Coaching/tuition institute an ni emaw, sumdawnna hmun dang emaw pawh ni se, GST pe tur chin chuan chhiah âwl rûk an tum tur a ni lo a, chhiah âwl rute chu hrem theih an ni tih an hriat chian a ṭha. GST-a lut tur chin chu nawr luih ngai loin inziak lut zel se, chhiah pe tur an nih chinah chuan chhiah pe ngei bawk rawh se.