Halpuah tel lo hunpui

Mizoram district hrang hranga bawrhsapte chuan an huam chhungah ṭheuh Krismas leh Kuthar vuakvetah halpuah leh halmawi khap a nih thu an chhuah. Home Minister pawhin Mizoram Kristiante hunpui leh halpuah a inhmeh loh thu leh, halpuah tel loa hunpui hman a theih thu a sawi a, police lam pawhin theihtawp an chhuah dawn tih a sawi.

Hun eng emaw chen chu Mizote hian hunpuia halpuah hal hi ngaiah kan nei a, Krismas leh Kumthar boruak tinuamtu angah kan ngai hial. A bikin kum lama naupang deuhte tan chuan he hunpui tinuamtu pawh a ni ve bawk a, midangte tana hnawksak a nihna lam an ngaihtuah lo a, mipui nawlpui pawhin chutiang zawnga ngaihtuah nachang kan hre vak lo.

Hun a kal a, halpuah leh halmawiin thil ṭha lo a ken telte kan hre chiang zel a, damlo tana manganthlak a nih tawhziate leh ran pawhin an tuar nasa tihte hmuh chhuah a ni zel. Heng kan thil hal ṭhinte hi hmun changkang zawka an hal ṭhinte anga hriselna khawih pawi lo chi a ni ve lo bawk nen, halpuah leh halmawi hnawk tihna a lian a, mi ṭhahnemngaiten halpuah tel loa hunpui hman zirtirna an aupui ṭan ta.

Tlawmngai pawl leh media lam an harh a, halpuah tel loa hunpui hman inzirtirna chak takin an kalpui a, kum eng emaw zat chu Mizoram khawpui ber Aizawl pawh a reh duak mai. Hunpuia halpuah hal loh kan thiam ta maw tihah sorkar a che sual a, hmun bik neia halpuah leh halmawi halna hun leh hmun a siam zauh a, hei hian mipui a fuihpawrh thar leh ta a ni.

Halpuah ri a reh hnuah kan hre thar leh a, a lawmtu aiin hnawk titu an tam zawk avangin khauh zawka halpuah khap duhna a lian thar leh ta. Kumin Krismas boruakah hian halpuah hal lo turin rilru siam ila, halpuah leh halmawi tel loin hunpui i hmang ang u.