Sorkarin khualzin tangkhang buaipui zel se

Information & Public Relations (IPR) minister chuan, Citizenship Amendment Bill (CAB) avanga buaina chhuaka Mizo tangkhang mekte chhawmdawl hna sorkarin a thawh thu a sawi a, "Mizoram House hrang hrangah leh hmun himahte dahin, an ei leh in turte a ?ul anga ngaihtuah sakin, YMA, Mizo Welfare etc. te nen theihtawp an chhuah mek a ni," a ti.

India ram hmun hrang hrangah CAB/ CAA avangin buaina a chhuak a, India hmar chhak a buai zual. Mizoram luh kâ ber Assam-ah buaina a chhuah avangin lirthei veivak a tibuai a, Shillong khawpui-ah curfew-te puan a nih bawk avangin Mizo zirlai leh sumdawng eng emaw zatin harsatna an tawk. Zirlai chawlh hmanga haw tur haw thei lo te, Guwahati-a rel lut tur an cancel avanga harsatna tawk Mizo tam tak an awm mek.

Hetih hunah hian sorkar pawhin Mizo mipuite buaina chingfel tura ṭan a la hi a lawm­awm takzet a, sorkar aiawha khaw­pui hrang hranga Mizoram House enkawltu lamin an tih tur tia hma an la hi Mizo khualzin tangkhangte tan a thlamuanthlak hle ang. Khawpui hrang hrangah Mizo khai­khawmtu pawl a ding a, anni lam pawhin an tih tur an ti sang sang bawk a, hun harsaa kan inṭanpui tawn hi a lawmawm hle a ni.

Krismas a hnai tawh a, zirlai haw tur leh khualzinte pawhin hunpui nang hman ngeia Mizo­rama kir an duh dawn a, thuneitu lamin khualzinte pui turin theih­tawp chhuah zel rawh se.