Hnam dang hnena sum khawn
MZP President chuan March 14, 2026-a MJA member-te nen an inkawmnaah, MZP-in hnam dang hnena sum an khawn ṭhin avangin an lo hmingchhiat tawh ṭhin thu a sawi a, "Pawlin tih dan anga kan lo neih tawh a ni a, tihtawp nghal vek chu a har a, mahse, titawp turin theihtawpin hma kan la mek," a ti.
MZP hi Mizorama zirlai pawl zingah chuan upa ber pawl a ni a; an hun kal tawhah ram leh hnam tan thil ṭha tam tak an ti tawh a, hnam thilah phei chuan Mizo mipui hmachhuan ber zinga mi an ni. Ram leh hnam tana an hmalakna ṭha tam takte hi a lawmawm a, ram, hnam leh mipuiin an chhawr hle tawh ṭhin.
Chutihlaiin, hmân aṭanga tunlai thlenga an hmingchhiatna ṭhin chu, hnam dang hnena sum khawn a ni a; hei hi mi tam takin MZP leh zirlai pawl dang ṭhenkhat an sawiselna, an demna leh an hmuhmawhna chhan a ni.
Ram leh hnam tan emaw, khawtlang tan emaw, mipui tan leh tute emaw tana thil ṭha tih tam tak lo tih tawhte hi thil ṭha lo leh miin an hriatthiam theih loh thil pakhat tihin a hliah khuh vek thei. MZP leh zirlai pawlte pawh thil ṭha tam tak an tih tawhte hi an thil tih ṭha loin a hliah khuh ṭhin.
MZP President-in an lo hmingchhiat fo tawhna - hnam dang aṭanga sum khawn titawp tumin theihtawp an chhuah thu a sawi hi a lawmawm. Hei hi mipui hmuha lan mawi tumna mai ni loin, a tak takin bawhzui se, tihhlawhtlin ngei tum se a ṭha hle.
Hetihlai hian, Mizo hnam kal zel tur leh a himna tur ngaihtuahin, Mizorama awm hnam dang ṭhenkhat lakah chuan donation khawn a ṭul riauna lai a awm ve thei a; ngaihtuahna zau leh fím tak púa kal a ṭul ang.
Mizote hi kan chhehvela mite tamzia ngaihtuah chuan hnam tlemtê kan ni a, humhalh ngai tak kan nih avangin mahni kan inhumhalh thiam a ṭul. Ram leh hnam humhalh tur hian dan ang taka kal vek chi a ni lo thei a, dan loa deuha kal pawha inhriatthiam a ṭul cháng a awm thei àwm e.
Zirlai pawlte hian hnam dang aṭanga sum khawn titàwp thei se tih hi mi tam zawk duh dan niin a hriat a; Mizo ram leh hnam him nan hnam dang chungchangah sorkarin dik taka dan a kenkawh a ṭul bawk.