MLA-te leh Assembly session

Mizoram Legislative Assembly pakuana ṭhutkhawm vawi rukna, February 17, 2026-a ṭan chu March 16, 2026 zan khan zawh a ni ta a, tluang tak leh hunruat ang taka rorel inkhawm neih a ni kha a lawmawm. MLA-te'n taima takin ro an rel tlang niin a lang a, ram leh hnam taka an inpekna leh ṭhahnemngaihna te a lawmawm hle.

Session tawp ni-ah kum 2026-27 chhunga Mizoram sum hman tur, budget estimate cheng vbc 17,469.92 pawh pawm a ni a, sum hman phalna pawh pawm nghal a ni bawk. Budget tharah hian hmasawnna hna thawhna tur a tam tawk loah a ngaih theih a; chutihrualin, ren tak leh dik taka hman a nih chuan hmasawnpui tham a ni tho a, sorkarin fîr taka sum a enkawl a, dik taka a hman a ngai.

March 9, 2026 khan Speaker-in House member-te a khak a, inthununna khawng deuh takin a lekkawh zui. Speaker-in MLA ṭhenkhatte'n thusawina atana hun an inpek an bawhchhe nasa lutuk leh, mi dang thusawi lai tihbuai tum râna thu sawi ṭhinte chu an ṭawngrinna (microphone) tihtawp zel a nih tawh tur thu a sawi a; House chhungah sapatâl a rem loh thu a sawi bawk.

Speaker hian MLA ṭhenkhatte na takin a khakna a ni a tih theih. Speaker-in na taka a khak ngai khawpa MLA ṭhenkhat an che fo kha a zialo a, Mizoram Assembly House hmingṭhatna–ṭul loa inauh buai vak vak a thleng ve ngai loa sawi ṭhin pawh a dik ta lo em maw ni tih tur khawp a nih cháng a awm.

Speaker-in khauh taka thu a sawi hnuah erawh chuan a ziaawm zui ta a; kha khan MLA ṭhenkhat chuan mi dang thusawi lai auh buai an tum hrim hrim a ni tih a tichiangah a ngaih theih a, inthunun theih a nihzia a tichiang bawk.

MLA-te hi party hrang hranga mite an nih angin, ngaihdan hrang nei an ni hlawm a, insawisel tum rân ṭhin an ni bawk. Hei vang hian han inhnial chângte chu a awm lo thei lo. Chutihrualin, ṭul hauh loa inhnial te, mi dang thusawi lai lo auh buai chiamte erawh a ṭha lo a, a mawi lo a, chìn zui loh a ṭha.

India rama Mizoram Assembly House-in hmingṭhatna a neih hi vawn nun zel a ṭul a, vawng nung zel theitu chu MLA-te an ni. Tun hnu zelah chuan MLA-te hian Assembly House zahawmna leh hmingṭhatna hi an vawng nung reng tur a ni a, tihmingchhe zawnga khawsa lo tura rilru siam rawh se.