Hun bitukah zawh ngei ni rawh se

Aizawl khawpui lailia Assam Rifles-in an chhuahsan tâk sorkarin a cheibâwlna tur, Aizawl Khawpui Chei Tharna Lungphun (Early Bird Projects) tih chu March 17, 2026 khan Chief Minister-in a hawng a, kawng zauh turah hna ṭan nghal a ni.

UDPA Department hotute tarlan danin, Aizawl Khawpui Chei Tharna hnuaiah hian kawngpui zauh leh kawngpui thar siam a nih dawn bakah, Vanapa Hall thar leh Heritage Court din a ni dawn a; thil dang dah tur a awm nual bawk.

Assam Rifles chhuahsan tak hmun pumpui aṭanga 60% chu ram àwl, green area anga awmtir tur a ni a, 40%-a zauah tihl chi hrang hrang dah a ni dawn. Green area-in a awh chin tur hi leilung, thing leh mau leh nungchate humhalhna lama ṭhahnemngai zual deuh tan chu a tlem mah mah mai thei a, ṭhenkhat tan chuan a zau mah mah ve thei tho bawk.

Duh dan leh ngaihdan a thuhmun vek thei lo a, AR-te'n an chhuahsan hmun hman zui danah pawh duh dan a inang vek lo tih a chiang. Kan ngaih pawimawh hi mi dangin an ngai pawimawh ve kher lo thei a, mi dang ngaih pawimawhte kan ngai pawimawh kher lo thei bawk. Chuvangin, uluk leh fimkhur taka a ngaihtuahtute'n thutlukna an siam hi pawm thiam a ṭul.

AR hmun hluiah Aizawl khawpui nuam leh mawi zawk a awm theihna tura sorkarin hma a la ṭan a, kut a thlak ṭan ta hi a lawmawm. Hna chi hrang hrang thawhna atan sum ruahman a tam tham a, sumte hi eirûkna leh hlemhlêtna tel loin, dik taka hman a ṭul.

Hna thawhna hmun tur hi khawpui laili a ni a, hnathawhin mipui a tihbuai chang leh harsatna a thlen chin a awm ngei ang. Mipui buaina leh harsatna a thlen rei loh nan chak taka hna thawh ni se, hna zawh hun bitukah zawh ngei a nih theih nan chak taka bawhzui ni rawh se.

'Today's pain, tomorrow's gain' tih thufing a awm a; hmasawnna hna thawh a nih lai chuan mipuiin an tawrh chin a awm lo thei lo. Harsatna eng eng emaw a awm a nih pawhin, khawpui nuam zawk, mipui tana ṭha zawk tur a ni tih hriain mipuiin an tawrh hram hram a ngai dawn a ni.