Mizo infiamnate uar zel ila

Doordarshan Kendra, Aizawl leh Mizoram Indigenous Games Association chuan March 18, 2026 aṭangin Ramhlun Sports Complex, Aizawlah Indigenous Games & Cultural Festival an buatsaih a, March 20, 2026 thleng awh tur a ni.

Indigenous Games & Cultural Festival hi Mizo infiamna chi hrang hrang hmanga inelna leh intihhlimna a ni a, Mizo infiamna chi hrang hrang ṭhangtharte hriattir tharna ṭha tak a ni a, a lawmawm. Hetiang hun buatsaih a ni hi a hlu a, mi tam zawkin chhim thei se, a chhimtute'n hlâwkpui ngei se. Uar zawk leh changtlung zawkin kum tin buatsaih theih ni se a duhawm.

Mizo naupang leh ṭhalai tam tak chuan Mizo infiamnate leh infiam dante an hre tawh lo. Hmasawnna sang zel karah Mizo infiamnate hi a rîral mai kan phal tur a ni lo a; ṭhangtharte'n an hriat a, an chhawm nun zel theih nan inzirtir zel a pawimawh. Naupan lai aṭanga inzirtir a ṭha a, Mizo infiamnate hi sikul tinah uar zawkin a taka naupangte tihpui ṭhin ni se a ṭha hle ang.

Mizo infiamna ang bawkin Mizo pawnto dante pawh inzirtir zel a ṭul a, sikul tinah uar thar ni thei se; chutiang tur chuan sorkar leh department hotute'n hma la se a ṭha hle ang. Chutihrualin, hmànlaia an pawnto danah a ṭha lo lai a awm mai thei a, a ṭha lo lai, indiriamna leh inhmuhsitna lam rawng kaite a awm a nih chuan, chu'ngte chu chìn zui loh pawh a ṭha àwm e.

Mizo infiamnate leh pawnto dante hi kan hnam nuna bet a ni a, thil ṭha tak pawh a ni. Ṭhangtharte'n an hriat a, a taka an tih a, an thiam a, an ngaihsan theih nan sorkar leh pawl hrang hrangte'n theihtawp an chhuah zel a ṭul.

Mizote'n hma kan sawn zel a, tun aia nasain hma pawh kan la sawn zel ngei ang. Hma kan sawn rual hian, kan hnam infiamna leh chìn ṭhin hlu tak takte hmusit zawng leh thlauhthla zawnga hmasawn erawh a ṭha ber lo. Mizo hnam nunphung leh chìn dante chawi sang zawngin hmasawn zel tum ila a duhawm hle a ni.