MCC zawm hi mi tin mawh a ni

State Election Commission chuan kumina Aizawl Municipal Corporation (AMC) inthlan hun tur March 18, 2026 khan a puang ta a, inthlan puan a nih rual hian AMC huam chhungah Model Code of Conduct (MCC) puan nghal a ni.

Ruahman dan chuan, AMC inthlana candidate tur tan March 25, 2026 thleng nomination thehluh theih a ni a, March 27-ah nomination endik tur niin, March 30 thleng inhnuhdawh hun hawn a ni dawn. April 21-ah vote thlâk a ni ang a, April 27, 2026-ah vote chhiar a ni ang.

Ram leh khawtlang hruaitu tur thlannaah rêng rêng MCC puan a ni ṭhin. MCC hi kalphung pangngai anga puan ve mai a ni satliah lo a, zawm tura puan a ni. A pawimawh em em a, political party-te leh candidate-te'n remchanna inang tlang an neih theihna tur a ni a, party-te leh candidate-te tana ṭha zawk tur a ni.

Chuvangin, political party te, candidate te, minister leh MLA te, party worker zawng zawngte'n MCC an ngai pawimawh tur a ni a, an zâwm ngei tur a ni. Mipui pawhin MCC an zawm a ṭul bawk.

MCC hnawksak ti an awm a nih chuan, thil dik lo leh thil ṭha lo tih duhtu an ni tihna a ni a; chutiang mi chu ram leh khawtlang hruaitu atan mi ṭha an ni thei lo a, mi hnawksak an ni zawk ang.

'Dante chu bawhchhiat tura siam alawm' tih ṭawngkam a awm ṭhin. He ngaihdan ṭâwmpuitu chu ram leh hnam tana mi hnawksak an ni ang. Dan hi bawhchhiat tura siam ni loin, zawm tura siam a ni. Chutiang bawkin MCC hi bawhchhiat tura siam ni loin, zawm tura siam a ni a, MCC zawm hi mi tin mawh a ni.

Party leh candidate ten inthlanah chak an duh vek a, tling turin theihtawp an chhuah a, ṭhahnem ngai takin an bei vek dawn. Ṭhahnem an ngai tur a ni rêng a, theihtawp an chhuah tur pawh a ni; mahse, ṭhahnemngaihna chuan dan a palzût tur a ni lo.

AMC inthlan turah hian an ṭang na tial tial dawn a, an ṭan nasat ber lai pawhin MCC-in a phuar a ni tih an hriat reng a, MCC bawhchhe lo tura an fimkhura an invèn reng a ṭul e.