Fûr laia chhiatna laka invênna
Aizawl West Outlet Project chu hna thawh ṭan turin March 18, 2026 khan UDPA Minister-in a khuhhawng a, cheng vbc 30.96 sênna tur a ni. Ruahman dan chuan, Project hmang hian Tuikual lui siam rem a ni dawn a, lui chungah km 1.68-a thui lirthei tlân theihna kawng metre 4-a zau leh kea kalna (footpath) metre 1.5-a zau siam a ni ang.
Project hi ruahman ang taka tihhlawhtlin a nih chuan a ṭha hle dawn. Lui chungah lirthei tlân theihna kawngpui leh kea kalna bik siam a nih dawn avangin mipui, a bikin Tuikual vengte leh a chhehvela chengte tan remchanna leh awlsamna nasa takin a thlen ngei ang. Lui kuang siam rem a nih dawn avangin, tui len laia tuiin a kam vel a hawrh ṭhin leh chumi vanga leimin theite a vêng hle bawkin a rinawm.
Aizawl West Outlet Project hna thawh tur hi a lian tham a, sum ruahman pawh cheng nuai 3,096 lai a ni. Inkalpawhna ṭha zawk a awm theihna atana hmalakna a nih piah lamah, leimin tur vênna atana tih a nia sawi a ni a; project pawimawh tak a nih avangin, hna ṭha taka thawh a nih a, a hun taka zawh a ṭul.
Aizawla luikawr dangteah pawh Aizawl West Outlet Project ang chi, lui kuang siam rem leh lui chunga kawng siam theihna a awm nualin a rinawm a; hmalak theihna ang angahte chuan hmalak zel theih ni se, sorkar hotute leh department hotute'n zir chiangin bawhzui thei se a ṭha hle ang.
Fûr kan thleng leh dawn hnai tawh a, fûr hmachhawn turin tun aṭangin sorkar, khawtlang leh mipui kan inruahman lâwk a ngai. Vanduainate hi pumpelh vek theih ni lo mah se, 'vanduaina' kan tih ṭhenkhat hi chu fimkhurna leh inruahman lâwkna ṭha hmangin pumpelh theih a ni.
Mizoramah fûr laiin chhiatna lian a thlen fo loh nan invênna awmze nei zawk leh daih rei tur kalpui a ṭul. Chutiang atan chuan sorkarin Aizawl leh khawpui dangahte Storm Drain Project a kalpui mek a; Aizawl West Outlet Project pawh hi chhiatna thleng thei laka invenna chi khat a ni bawk. Heng project-te hi a nih dan tur ang taka a hlawhtlin theih nan thawktute'n hna an thawk tur a ni a, sorkar thuneitute'n ṭha takin an vil tur a ni.