Pek ṭeuh aiin pek zin uar a ṭul ta

Association for Voluntary Blood Donation chuan March 20, 2026 khan Aizawlah a thlawna thisen pek chungchanga inràwnkhawmna, Consultation Meeting on Voluntary Blood Donation an buatsaih a; Central YMA, kohhran hrang hrang ṭhalai pawl leh NSS lama hotute an tel.

Inràwnkhawmnaah hian AVBD hruaitute'n Mizoramah a thlàwna thisen pek a ṭhat lehzual theih nan leh thisen pekte ṭangkai lehzuala a mamawhte'n an hman theihna tura rawtna an neihte an sawi a; an rawt ber pakhat chu, pawl hrang hrangte'n blood donation camp an huaihawtin, ṭum khatah thisen pek ṭeuh tum kher lo a, zing zawka donation camp huaihawt a ni.

Blood bank lama hotute sawi danin, Mizoramah blood bank/centre 11 a awm mek a, Aizawlah pathum a awm. Aizawla blood bank pathum bakah, Lunglei Civil Hospital-ah component separator a awm a, chumi hmang chuan thisen chu chi thumah ṭhen a ni ṭhin.

Blood component separator hmangin thisen chu chi thum PRBC (red blood), platelet concentrate (thisen var) leh fresh frozen plasma (FFP)-ahte ṭhen a ni a; hei vang hian thisen chi li - whole blood (thisen ṭhen loh - ni 35 dam), PRBC (ni 35 dam), platelet (ni 5 dam) leh FFP (kum khat dam) te a awm.

Tunlaiah chuan doctor-te'n thisen an chawhin whole blood an chawh tawh meuh lo a, thisen ṭhen hran tawh an chawh tlangpui; thisen ṭhen hran zingah pawh ni 5 chauh dam platelet an chawh tam ber. Platelet hi doctor-te'n an chawh tam ber a nih bakah, dam rei lo ber a nih avangin platelet bik indaih lohna a nasa bik a ni.

Hmasawnna sang zel leh khawl changkang zel avangin ṭum khata thisen unit tam tak pek a nih hian, ni 5 chauh dam leh damlo hnena thisen chawh tam ber platelet bikah a fuh tâwk lo ta deuh a; ṭum khata pek ṭheuh ai chuan, tam lutuk loa camp buatsaih ngun a ṭha zawk tawh tih a ni.

Thisen pek dan kalphung ṭha zawk awm ta hi thisen pe ṭhin pawlte'n an hriatthiam a ṭul. Kan thisen pekte ṭangkai zawka hman a nih theih nan blood donation camp ṭum khatah thisen pek ṭeuh tum kher loin, donation camp zing zawkin buatsaih theih ni se a duhawm. Blood bank lamin reh bun chin an nei a nih pawhin, hriatthiamna zau tak neih a ṭul ta a ni.