Myanmar-a tuialhthei thawn luh tihtawp

Middle East (West Asia)-ah indona a awm a; indona a chhuah hnuah tun hnai khan Mizoram chhim lama district magistrate-te'n an district aṭanga Myanmar ram chhunga tuialhthei phurh luh khapna thupek an chhuah.

Myanmar lama tuialhthei phurh luh khapna thupek district magistrate-te'n an chhuah hian Mizoram aṭangin Myanmar-ah tuialhthei thawn lut an awm ṭhin a ni tih a tichiang a; thawn luh ṭhin ni lo se, thupek chhuah a ngai lo. Mizoram chhim lam kaltlangin tuialhthei tam tham tak Myanmar lamah an thawn lut reng nia sawi ṭhin a ni.

Mizoram chhim lamah hian India-in ram dang nena insumdawn tawnna a kalpui lo a, eng bungruaah pawh dan anga insumdawn tawnna a awm lo; tuialhthei thawn luh ṭhin pawh dan loa tih a ni.

Mizoram aṭanga Myanmar lama tuialhthei thawn luh aṭang hian Mizoram emaw, Mizo mipui emaw hlâwkna tur a awm miah lo a; mi tlemtê, tute emaw hlâwkna tur chauh a ni.

Mizoram aṭanga Myanmar-a thawn luh rau rauah, Mizorama thar leh siam chhuah thilte a nih chuan kut hnathawktu eng emaw zatin a hlâwkna an tél a ni thei. Tuialhthei erawh chu Mizorama lak chhuah chu sawi loh, tam tak chu India ram pawn aṭanga lak a nih avangin, Mizoram aṭanga Myanmar-a tuialhthei thawn luh a nih hian Mizoram leh a mipuite'n kan hlâwkpui lo. Kan hlâwkpui lo mai ni loin, state chhunga tuialhthei a vàn phah zawk thei a ni.

Siaha District Magistrate phei chuan, mi ṭhenkhatte'n Myanmar lama hralh chhàwn turin Siaha district-a filling station ṭhenkhatah petrol leh diesel a hlawmin an lak ṭhin avangin an district-ah tuialhthei indaih lohna a awm phah ṭhin tih a tarlang. Hei hian Myanmar-a tuialhthei thawn luh ṭhinin Mizo mipui a nghawngzia a tichiang.

Myanmar-a tuialhthei thawn luh khapna thupek district magistrate-te'n an chhuah hi mi tinin kan zawm ngei a ṭul. Mizoram mipuiin tuialhtheiah harsatna kan tawh loh nan Myanmar-a thawn lut ṭhin sumdawngte'n an tihtawp rih a ṭul a, oil dealer (filling station) zingah thawn lut ṭhin an awm a nih chuan an titawp hmak tur a ni.