Mahni rawtna versus thutiam

MNF president leh chief minister chuan, Citizenship Amendment Bill (CAB) chung­changah, mahni rawtna ang do zawnga vote thlak a puitlin loh avangin an MP pawh CAB vote tura an tih thu a sawi a, "Mahni rawtna do zawnga vote thlak a puitling lo. Chuvangin, kan MP pawh vote turin kan ti a, party thua ti kan ni e. Khawvel, India leh hnam dangte lakah kan rinawmna lantirna turin, a dodal zawnga chêt leh ṭha kan ti lo. Kan rawt anga pass tur dodal zawnga vote leh si chuan kan dinhmun a puitling lo ang. Rawtna anga pass tur na nâ nã, vote pui kha kan tih tur a ni," a ti. 

CAA avangin India ram hmun hrang hrang­ah buaina a chhuak mek a, Mizoramah pawh kan Lok Sabha MP neih chhunin CAB (CAA) thlawp zawnga vote a thlak avangin mipui dem a hlawh a, a bikin social media lamah a thutiama ding lo tia sawiselna a ri ring hle. Kan Lok Sabha MP hian ama duh thua vote thlak a ni bik lo a, a party MNF thutlukna a nih thu tun hnaiah MNF president ngeiin a puang ta. An thlawp chhan an sawiah chuan Mizoram huam tel loin an rawt a, an rawtna chu tihpuitlin a ni a, chuvangin thlawp leh loh chu a puitlin loh thlak niin a sawi. 

Hetihlai hian MNF president hian CAB an duh loh thu leh CAB hi an kal tlangpui a nih chuan NDA aṭanga an inhnuhdawh tur thu a lo sawi tawh a; kan Lok Sabha MP ni ta pawh hian inthlan campaign laiin CAB a do tur thu leh a ṭul a nih chuan a martar ngam hial thute pawh huaisen takin a lo sawi tawh. MNF lam hian ṭan­na an neih chu CAB chu kaltlangpui ni tho mah se, Mizo­ram a huam ta lo a, Mizoram ber a huam loh chuan do zui zel a ṭul an ti lo mai ni loin a CAB-a chu an thlawp ta hial a ni. Chutihlaiin ṭha an tih loh khan min huam tak loh avangin an thlawp lêt thei ta mai hi mipuiin mak an tih chu a ni. 

MNF hian BJP sorkar laka puitling taka lan an duh luatah CAB/ CAA hi an thlawp ta a, inthlan dawna an thutiam anga awm aiin ‘puitling’ anga lan hi an thlang ta zawk a nih hmel a, mipui ngaihdan a nih leh nih loh chu kan boruak tawn mek en hian a chiang mai e.