National song sa tura innawr loh ni se

Ministry of Home Affairs chuan India rama sikul tinah national song 'Vande Mataram' cháng kima sak chhuah ngei ngeina tur thupek tun hnaiah a chhuah a; February 6, 2026 aṭanga hman ṭan tura tih a ni.

MZP chuan March 9, 2026 khan press conference neiin, sikul zawng zawnga Vande Mataram sak chhuah emaw, ngaihthlak chhuah emaw ngei ngei tura tih chu an duh loh thu an puang a, Mizoram sorkarin thu mûm a neih hma chuan sorkar laipui thuchhuak hi tihlawhtling lo turin an ngen.

Chief Minister pawhin March 16, 2026 khan Assembly session-ah, sorkar laipuiin sikul leh sorkar inkhawm (function) apiangah Vande Mataram sak/ngaihthlak tura a tih chu a vai vaia an pawm tlàn theih a rin loh thu a sawi a, "Cháng hnihna chin hi chu ram ngaih hla a ni mai. A cháng dang en hi chuan Hindu Pathian biakna a ni tawh hlawm," a ti.

Vande Mataram chàng tàwp lamah chuan Hindu pathian hming ṭhenkhat tihlan a ni. Bankim Chandra Chatterjee-a'n November 7, 1875-a a phuah Vande Mataram-ah hian cháng ruk a awm a, Jawaharlal Nehru hun laiin cháng hnuhnung lam cháng li chu national song-ah telh a ni lo a; mahse, tunah chuan a cháng zawng zawng telh a ni leh tawha sawi a ni.

National song-ah Hindu pathian hming a lan avang hian tihluihna ang deuha India ram puma sikul leh sorkar thil tihna zawng zawnga sak/ngaihthlak chu mi tam takin an duh lo a, India ram hmun ṭhenkhatah pawh dodalna a awm mek.

India ram hi sakhaw zalenna ram a ni a, tihluihna hmanga sakhaw dang inzawmtir emaw, thil tihtir emaw chu tih loh tur a ni a, Constitution-ah a phal lo. Chutiang a nih laia sakhaw dang betu zawng zawng huama Hindu pathian hming lam telna national song sa tura sorkar laipuiin thu a chhuah hi a fuh lo. Hindu ni lo, sakhaw dang zuitute rilru aṭangin a dik lo a, ram Danpui ngaihtuah pawhin a dik lo.

Mizoramah chuan sikulah leh sorkar thil tihnaah national song an sak/ngaihthlak loh a ṭha zawkin a rinawm a, hotute insûm se. Mizoram sorkar pawhin sa/ngaithla turin sikulte leh sorkar official-te nawr lêm lo se a ṭha àwm e. Sikulah phei chuan, Mizoin aia upa zahna hla ṭha tak kan neih leh hla ṭha dangte sak ṭhin ni se a duhawm.