Social media-ah mi kutchhuak zah a tul

Doordarshan Kendra, Aizawl chuan, DD Mizoram Indigenous Games & Cultural Festival 2026 (March 18-20) zawh tâk video, DDK-in an tihchhuahte chu a neitu DDK phalna leh hriatpuina tel loin youtuber ṭhenkhatin social media-ah an dah tih an hriat thu leh, an ngaih thutak thu an tarlang.

DDK video ṭhenkhat, youtube channel danga dahte chu DDK emblem paihin, youtube channel neitute logo dah zawk tâk daihte a nih thu leh, chutianga tih chu copyright infringement leh Copyright Act kalh, dan bawhchhiatna, dan anga hremna theih a nih thu an tarlang bawk.

Mi tam takin social media hrang hranga dah tur (content) an duh lutukna lamah dan an bawhchhe fo. Dan bawhchhetu ṭhenkhat chu dan bawhchhia an ni tih hre lote an ni thei a, ṭhenkhat chu danin a phal loh a ni tih hre reng chunga dan bawhchhe luite an ni ngei ang.

Social media-ah content duh lutuk avanga mi tam takin dan an mausàm lutuk hi chu a zia lo tak zet. Tam tak chu an sum duh luat vang a nih a rinawm a, an sum duh luatah thil mawi lo te, dan bawhchhiatte an pawisa lo ni berin a lang.

Social media aṭangin sum a lak luh theih a, chuvang chuan mi tam takin social media-ah thil an dah (post) ṭhin a, tunlai hian an uar zual hle. Social media-a dah tur content kan duh a nih pawhin, mahni kutkawiha tih ve mai tur a ni a, mahni inséngso pawha tih ve mai tur a ni. Mi thuziak (article)-te chhiara YouTube-a dah tur chungchangah pawh, a ziaktu phalna lak hmasak a ṭha.

Miin sum leh pai leh tha sénga an tih sa, an phalna pawh la loa social media-a lo tihchhuah chhàwn hi chìn loh tawp chi a ni a, mahni intheh derè-na chi khat a ni tih hriat a ṭha. Mi kutchhuakte hi kan zah tur a ni a, an phalna la loin kan tichhuak chhàwng mai mai tur a ni lo. A neitu phalna la hmasa loa mahni duh dan dana lo tihchhuah chhàwn ve ngawt ṭhin hi sim hmak chi a ni.

Media hian ethic a nei tih kan hriat a ngai a, media ethic chu engte nge tih hre tura kan inzir ve a ṭul. Social media khawih thiam tan media ethic zawn hmuh theih loh thu a awm lo.

Social media-ah hian sum lak luh kan duh a nih pawhin 'fair' takin kan ti tur a ni a; mihring mihrinnaa thil mawi leh mawi lo te, dik leh dik lote ngaihtuah hmasak zel a ṭul tak zet. Social media hmangtu zawng zawngte fimkhur tlan a ṭha e.