Fai inelna bawhzui ṭhat a pawimawh

UDPA department, Aizawl Smart City, AMC leh Central YMA buatsaihin March 28, Inrinni khan Aizawlah Faina Hnatlangpui huaihawt a ni a; veng hrang hrangah mi ṭhahnem tak an thawk chhuak.

Aizawl pum huapa faina hnatlangpui huaihawt a ni hi a lawmawm a, a ṭha. Mahse, Aizawl pum huapin hnatlang tih fo theih a ni lo a; awmzia nei tho mah se, a nih tur ang a ni pha lo deuh bawk.

Aizawl pum huapa faina hnatlang tih ai chuan, mahni veng ṭheuhah mahni remchan ang zela faina hnatlang neih hian awmzia a nei lehzualin a rinawm. Mahni veng ṭheuh tinzawna faina hnatlang uar zawka nei turin veng tinte'n rilru pu thei ila a ṭha hle ang.

Khawtlang huapa faina hnatlang koh fo pawh a harsa hle a; chuvang chuan, khawtlang hruaitute'n hnatlang an kohah innghat mai lo a, chhungkaw tinin, mi tinah mahni in leh a velte fai taka enkawl ṭheuh thei ila a ṭha berin a rinawm.

Kuminah Aizawla YMA branch-te fainaa inelna, Aizawl City YMA Branch Fai Intihsiakna buatsaih leh a ni dawn. Aizawla YMA branch anga veng fai inelna hi nikum khan buatsaih a ni tawh a; inelna hian awmzia a nei hle a, veng tam takin nasa takin ṭan an la a, an veng a fai phah hle. YMA branch anga fai inelna buatsaih tawhin awmzia a neih em avang hian kuminah inelna buatsaih leh a ni tur hi a lawmawm.

YMA branch anga veng fai inelna hi CYMA-in a enkawl YMA branch tinte'n ṭha takin bawhzui se, veng fai ber nih tumin ṭan la ṭheuh se a duhawm. Veng lian deuh leh miin an pan khawm deuh veng ṭhenkhat chuan fai thei tak tak loah an inngai niin a hriat a; hetiang ngaihdan hi a fuh lo. Fai duhna leh fai tumna tak tak a awm chuan veng fai ber a nih theih tih a hriat tawh a; hei hi nikuma fai inelna aṭangin a chiang.

Veng fai ber ni ve thei loah inngaih tur a ni lo a, fai duhna leh tumna tak tak kan neih phawt chuan veng fai ber a nih theih tih i hre reng ang u. Aizawl a fai chuan Mizoram páwn aṭanga rawn tlawhtute lakah kan khawpui ber hi kan tihmingṭha lehzual thei dawn a ni.