Khelmuala phûllem phah belh zel hi

Mizoramah kum 2010 aṭangin khelmualah phûllem phah ṭan a ni a, Lammualah phah hmasak ber a ni. Chumi hnuah district khawpui tinah phûllem phah khelmual a ni tawh a, khaw lian deuh leh lian vak lo thlengin phûllem phah khelmual a awm tawh. Tunah pawh khelmualah phûllem phah belh mek zel a ni.

Khelmuala phûllem phah hi a ṭha em em a, a bik takin infiammite tan a ṭangkai em em. Chutihlaiin, phûllem phah hi Mizote vêkin harsatna kan tawh phah mek ve bawk. Phûllem phah kan uar mah mah em ni aw, a tih theih.

Mizo kan nih avanga thil tih ṭhin eng emaw zat kan nei a, Kristian nihna leh kohhran mi kan nihna zâwnah chìn ṭhan chi hrang hrang a awm. Mizo nihna leh khawtlang nun avanga thil tih kan neih ṭhinahte hian hmunhma kan mamawh zel a; thil hrang hranga hmunhma mamawh dan erawh a inang lo.

Mizote hi Kristian, kohhran mi kan ni vek a tih theih a, hmân aṭanga tunlai thlengin kohhran hrang hrangte'n inkhawmpui lian tak tak kan nei ṭhin. State pum huap leh, a cháng chuan state páwn lam huap inkhawmpui lian hmanna atan hmun zau ṭha tak a ngai.

Inkhawmpui lian neihna ṭhin khelmualah phûllem phah a nih tâk zel avangin inkhawmpui lian neih theihna hmun a tlem ta hle a; inkhawmpui lian neihna tur awm mang lo thei hial khawpin kan awm ta. Inkhawmpui lian neih hi kohhran thil tih pawimawh, Mizo hnam nuna bet ve tlat tawh leh mipui náwlpui huap a nih avangin hlamchhiah chi a ni bik lo. Inkhawmpui liante hi a khát emaw, a zing emaw, hmunhma a mawh zauh dan a ngai deuh reng.

Phûllem kan phah belh zel a nih pawhin, inkhawmpui lian tham neihna tur awm lo khawp chuan phah lo ila; tuna kan neih sate hi duhtâwk rih ila a duhawm. Infiammite hi duhsak a ṭha a, mahse, infiammite duhsak vanga mi tam zawk mamawh hlamchhiah a, harsatna siam erawh a dik bik lo.

Phûllem phah belh vak vak tawh loin, phûllem phah tawhte hi inelna lian zawk thleng thei khawp tur leh, phûl tak tak (natural grass) khelmual pa hnih/khat tal nei turin ṭan la tawh zawk ila a ṭha ang em? Heti zawng hian sorkar lama thuneitute'n ngaihtuahna hmang thei se a ṭha hle mai.