Mimal nun hmanga inbeih kalsan ila

MNF Legal Board hruaitute chuan March 31, 2026 khan Aizawl Press Club-ah press conference neiin, inthlannaa hmeichhe candidate-te zahawmna tibawrhbâng thei zawnga beih an ni ṭhin chu pawi an tih thu an puang a; inthlanna felfai leh thianghlim a awm theih nan sorkar lai ZPM party worker-te chu hma hruaitu ni turin mipuiin an beisei niin an sawi.

MNF Legal Board hian hmeichhe candidate-te'n mawi lo tak taka beihna an tâwk ṭhin chu hmeichhiate hmuhsitnaa an ngaih thu te, AMC inthlan tura an candidate zinga pakhat chu mipat hmeichhiatna rawngkaiin mawi lo taka beih ṭhin a nih thu te, mimal nun phawrh zâwnga campaign chu Model Code of Conduct-in a khap thute an sawi a ni.

Inthlan vuakvêta mimal nun leh tun hma nun inphawrhsak an duh loh thu MNF Legal Board-in an sawi chhuak hi a ṭha a, an ṭhahnemngaihna a lawmawm. Chutihrualin, mimal nun hmanga inbeih hi tun hma aṭanga tun thlenga la awm reng a ni a, tihtàwp harsa tak a ni.

Candidate-te mimal nun sawichhiatna emaw, mimal taka inbeihna emaw hi inthlanah chuan a awm fo a, hmeichhia chauhin an tâwk lo a, mipa pawhin an tâwk tho. Candidate-ah mipa an tam fê zawk ṭhin avangin mipa hi mimal nun hmanga beih tâwk nasa zawk an ni nghe nghe àwm e.

Politics-ah inbeihna a awm reng a, inbeihnaah hian thu dik leh dik lo a inpawlh nawk ṭhin. Inbeihnate hi politics-a zuang lut, a bikin lut tharte'n an hriat chian a ngai. Politics-a awm tur chuan tuáng tihchhah viau theih a ngai rêng a ni.

Hetianga kan sawi rual hian, mi mimal nun phawrh chiam chiam te, tun hma nun, kum tam tak kal tawha mi sawi chhuah ṭhinte hi a ṭha tihna a ni lo. Thil ṭha lo kan tih tawh ṭhin, kum tam tak kan kalsan tawhte sawi chhuah a, politics-a inbeihna atana hman ṭhin hi simin, kalsan thei tawh ila a duhawm.

Inthlanna felfai leh thianghlim a awm theih nan hma hruai turin MNF Legal Board-in sorkar lai ZPM mite an beisei hi a ṭha reng mai. Chutihrualin, inthlanna felfai leh thianghlim a awm theih nan hian hma hruaitu tur leh hma latu tur vek kan ni a; mi dang tih turah dah loin, keimahni leh kan pawl aṭanga bul kan ṭan tlân a ṭul zawk a ni.