State pum hmasawnna tura Ram leilung hausakna hâi chhuah

Chief minister Zoramthanga chuan, "State pum hmasawn theihna turin chhung tinin thawh chhuah ṭha tak an neih a, retheia tumah an awm loh nan ram leilung hausakna hâi chhuah tum a ni. Covid-19 avangin chak takin hmalak theih rih loh mah se, tunah vaccine pek bul ṭan turin ram a inpuahchah tawh a, beiseina êng nen chak taka hmalak thuai beisei a ni," a ti. 

Mizoram hi India ram state rethei zinga mi a ni a, khawpuia mi ṭhenkhat hi awm thei viau tawh mah se mipui nawlpui hi an la rethei hle. Kan mihausa ṭhen­khatte'n India mai ni lo khawvel tukverha dah chhuah ve ṭan tumin nawmchenna leh zin khawthawnna lamah phei chuan khawvel hmun nuamte an tlawh ve thei ta reng mai a; nimahsela miretheite retheihna hi a la thuk em em a, Mizo tam zawk khawsak dinhmun hi a la ṭha lo hle a ni. 

Chutihlaia Mizoram 'retheia tumah an awm lohna tur' kan chief minister-in a hre fuh hi thil lawmawm tak a ni a, a tum anga rethei awm lohna ram a nih theihna turin chak takin ṭan la zui zel se a ṭha hle ang. CM sawi dan chuan retheia tumah an awm lohna turin ram leilung hausakna hai chhuah tum a ni a, eng chiah nge sawi chiang rih lo mah se retheia mi an awm tawh lohna tur a nih chuan thil lian tham tak a ni ngei ang. 

State khat hotupa berin hetiang thil a sawi a nih chuan ruahmanna fel tak a nei tawh ngei ang tih pawh a rin theih a, Mizoram leilung hausakna hi gas a ni thei a, oil a ni thei a, thil dang ṭha zawk leh hausak phahna tham thil a ni thei bawk. Engpawhnise Mizoram mipui retheia an awm tawh lohna tur leh state pum hmasawnna tur thil hi chak takin bawhzui ni se, Covid-19 hian he thil ṭha tak hai chhuahna tur hi a dal rei tawh lo turah i ngai ang.