Chhiarpuiah ṭangrual tlang ila

India ram Chhiarpui 2027 chu Mizoramah April 1, 2026 khan ṭan a ni ta a, Chief Minister chhungkuaah bul ṭan a ni. Chhiarpui buaipuitu leh mawhphurtute chuan tunah hian ngawrh takin hma an la mek.

Tun ṭum chhiarpuiah hian Phase-I ah April 1-15, 2026 chhungin mimal chanchin leh khawsak dan dinhmun chhiar (self-enumeration) a ni dawn a; April 16 - May 15, 2026 chhungin in awm zat leh ina thil awmte chhinchhiah (house listing & housing census) a ni dawn. Phase-II chu mihring chhiar (population enumeration) a ni dawn a, February 2027-ah ṭan a ni ang.

Chhiarpui 2027-ah hian paper hman a ni dawn lo a, chhinchhiah ngai zawng zawng chu mobile application leh portal-ah thun vek tur a ni. Phone hmangin mahnia inziah luh (self-enumeration) theih a ni a, se.census. gov.in portal-ah tih theih a ni.

Mahnia inziah luh theih a nih avang hian, a ti theite chuan lo inziah luh lawk ṭheuh ni thei se a ṭha a, inziak lut thiamte'n ṭhenawm khawvenga thiam ve lote tihpui thei se a ṭha hle ang.

Tun hma aṭangin Mizoramah chhiarpui emaw, thil dang eng emawa inziah luh ngai hlau pawl an awm tawh ṭhin a, a zialo ṭhin hle. Tun ṭuma chhiarpui erawh hi chu Mizoram mipui hian hlau lo vek ila, hlau deuh emaw, duh vak lo emaw an lo awm palh a nih pawhin, a hlauhawm lohzia leh thil pawimawh a nihzia hrilhfiah theitu nih tum ṭheuh ila a tṭa hle ang. Mi dangte sawiṭhaihtu nih loh a ṭha bawk.

Chhiarpui hi a pawimawh em em a, India ram pum huap a nih angin India ram tan a pawimawh hle. Mizoram state bik tan a pawimawh em em a, district level-ah leh khaw mal ang pawhin a pawimawh em em. Ram pumpui, state leh khawtlang ang pawha statistics dik leh rintlak neihna tur hmanrua a nih avangin chhiarpui hi Mizoram mipuite'n kan ngaih pawimawh ṭheuh a ṭul.

Mizoram mipui ṭanrualna hmangin India rama chhiarpui ti felfai ber leh ti ṭha ber state kan nih theih a rinawm. Chutiang rilru pu chung chuan chhiarpui buaipuitute tan dawr nuam leh thawhpui nuam, a remchan anga lo thawhpuitu nih tum tlang ṭheuh ila a duhawm e.