Direct recruitment-a thawktu lak
Mizoram sorkar chuan college-a zirtirtu, assistant professor tur a la dawn a, a lakna buaipui chu dan angin Mizoram Public Service Commission kutah a dah. MPSC chuan chawlhkar hnih zên zâwn interview an buatsaih hnuah April 1, 2026 khan result tichhuak a, college zirtirtu atana an rawt mi 31, department/subject 13-a mi turte chu an puang. Panel list-ah mi 28 an awm bawk.
Mizoram sorkar hnuaia college eng emaw zatah zirtirtu an indaih lo a, a bik takin Aizawl pawn lamah an indaih lo nasa zuala sawi a ni. Zirtirtu indaih lohna hriaa sorkarin assistant professor, a ngheta thawk tur mi 31 lai ṭum khata a la thar leh ta hi a lawmawm a, eng emaw chen chu indaih lohna a phuhruin a rinawm.
College hrang hrangah hian zirtirtu chi hrang hrang - a ngheta thawk te, a nghet lo - state contract-a thawk te, Centrally sponsored scheme hnuaia thawkte leh part time-a thawkte an awm ṭhin a, an awm mek bawk.
Tun dinhmunah chuan college zirtirtu, a nghet loa thawkte hi a ngheta thawkte ang bawkin college-a zirna kengkawhtu, tluang taka kaltirtu an ni a, an pawimawh hle. College-a thawk mek zingah a nghette aia a nghet loa thawk zingah thiamna nei sang zawk pawh an awm nual tawh a; chutihrualin, hlawh leh hamṭhatna an neih erawh a inthlau hle.
Mizo zingah college zirtirtu ni thei leh ni tum mi ṭhahnem tak an awm tawh a, academic line-a kal tuma insáwrbing mi tam tak an awm. Chung mite chuan inelna thianghlim tak an neih a, tute emaw duhsakna bik awm lo a, a thiam leh ṭha apiang an tlin theih nan college zirtirtu lakna hi dik taka tih zel a ṭul.
Sorkar hnathawk rêng rêngah hian a nghet loa thawk tur lak a nih hian induhsakna vanga han inthun mai a awl deuh niin a lang a; hun a kal a, an ngheh theih dan tur zawn a ni leh ṭhin. Recruitment mumal awm loa a nghet loa thawk phawt a, a hnua nghet zui ta mi eng emaw zat an awmin a rinawm.
Sorkar hna hrang hrangah leh college zirtirtu atan a tling leh tlâk apiang lak an nih zel theih nan direct recruitment-a tih zel a ṭha. College zirtirtu tur dik taka lâk a nih zel theih nan dan ang takin MPSC kuta dah zel ni rawh se.