Sorkar sum pûk leh SASCI
Sorkar laipuiin India rama tlang ram state-te hmasawnna tura sum a puktirna, SASCI hnuaia sorkar sum kum 2026-27 atana sum ruahman zat tun hnaiah tihchhuah a ni a, Mizoram tana sum ruahman zat a tlem fál hle nia sawi a ni.
Kum 2026-27 atana SASCI sum pûk tur ruahman dan tarlan chu - Arunachal Pradesh tan vbc 4,900, Himachal Pradesh vbc 3,920, Nagaland vbc 3,880, Uttarakhand vbc 3,460, Tripura vbc 3,450, Manipur vbc 2,400, Meghalaya vbc 2,070, Sikkim vbc 820 leh Mizoram tan vbc 100 a ni. Mizoram chan a tlem fál tih a lang a, chuvang chuan eptu party-te'n nasa takin sorkar an sawisel mek.
Kumin February 17 - March 16 inkara Assembly budget session lai khan Finance department enkawltu Chief Minister-in zawhna a chhannaah, an party-in sorkarna an chan hnuah state sorkarin cheng vbc 5,503.31 a pûk tawh thu a tarlang. ZPM kaihhruai sorkarin sum a pûk tawh zat hi a tam tiin eptu party-te chuan an sawisel ṭhin bawk.
CM-in a tarlan dan chuan, December 2023 aṭanga February 2026 thlenga Mizoramin sum vbc 5,503.31 a pûk tawhah SASCI aṭanga pûk tam berin, vbc 2,482.57 a ni a; SASCI tel loa sum pûk tawh zat chu vbc 3,020.74 a ni.
Eptu party-te'n state sorkarin sum a pûk tam an sawisel a, chutihrual chuan, sorkarin sum a pûk tamna ber SASCI hnuaia Mizoram tana sum ruahman tlem fál lutuk an sawisel leh tho bawk.
SASCI hnuaia Mizoram sum chan tur a tlem fál lutuk eptu party-te'n an sawisel hi a àwm mai thei. Chutihrualin, Mizoram sum chan tur hi state dang ang zata tam ni ta se, Mizoramin sum a pûk zat a pung ngei dawn a; sum pûk tam chu eptu party-te vêk chuan an sawisel leh tho bawk si a ni.
Mizoram sorkarin sum a pûk leh SASCI-a sum ruahman zat sawiselnate thlir hian, engti zawng pawhin eptu party-te hi chuan sorkar an sawisel hrim hrim tih a lang.
State sorkar tan sum a pûk loh theih loh a, thawh chhuah nei tlem Mizoram tan sum pûk ngei a ṭul zual. Mizoram hmasawnna tur a nih chuan tute emaw sawiselna vanga tîm loin sum pûk zel ni se; Mizoram tana phurrit lutuk lo tur erawh ngaihtuah tel a ṭha. Sum pûkte chu dik tak leh ṭha taka hman a, Mizoramin hma a sawn phah ngei hi a pawimawh zawk.