MUHCS chungchangah indàwr zel se

Mizoram State Health Care Society-in a tarlan danin, sorkar kum liam ta April 1, 2025 - March 31, 2026 chhungin Mizoram Universal Healthcare Scheme (MUHCS) 1.0-ah damlo mi 1,08,536 enkawlna atan sorkarin cheng nuai 17,157 a sêng. MUHCS zawm lo damdawi-ina damlo enkawlnaa senso sorkarin bat a nei lo.

Sorkar kum liam taa damdawia mipui náwlpui inenkawlna senso sorkarin a tumsak hi a tam tham hle. Mipui tan lawm viauna tur a tling a; sorkar thil tih ṭhatah hi chuan mipuiin lawm nacháng an hriat a ṭha.

Mizoram sorkarin kum 2008 aṭangin mipui náwlpui tan healthcare scheme a kalpui ṭan a, sorkar inthlâk cháng awm mah se, tihtawp ngam a ni tawh lo a, tun thlengin kalpui a ni ta zel. Inenkawlna senso hmuh let theih zat a pung ve hret hret a, tunah chuan kum khatah cheng nuai 5 lai a ni ta. Mipui náwlpui tana sorkar hmalakna hi a lawmawm tak zet.

Hetihrual hian, MUHCS kalpui dan hi mi zawng zawng duhthusam a ni vek loin a rinawm a, mi ṭhenkhat tan sawisel tur a awm nual thei ang. La fuh tâwk lo deuh leh felfai tâwk lo te pawh awm thei a ni. A fuh tâwk lo lai miin an sawi chhuahte leh sawiselnate hi sorkara a buaipuitute pawhin inenfiahna atan leh insiamremna atan an hman thiam a pawimawh.

MUHCS zawm lo damdawi-ina enkawlna damlo eng emaw zatte senso pawh sorkarin a tumsak. Hun kal tawhah damlote damdawi-ina inenkawlna senso sorkarin a pek mai thei lo a, kum hnih velte a bat hun lai a awm. Mipui an buai a, an mangan phah hle ṭhin.

Kum liam ta 2025-26 ah erawh chuan financial year a zawh hnu chawlhkar khat chhunga sorkarin damlo enkawlna man pek ngai a pe tla vek thei leh bá a nei lo nghal thei hi a lawmawm. Sorkarin theihtawp a chhuah tih a hriat a, thawktute an thawkrim hle tih a lang.

MUHCS chungchanga mi tam tak duhthusam la ni lo chu mimal damdawi-in liante'n an la zawm lo hi a ni. Mimal damdawi-in zawng zawng hian zawm vek thei se duhthusam a ni. MUHCS chungchangah mipui hmá ngaiin sorkar leh mimal damdawi-in thuneitute indàwr zel se, inhnuhhniam a ngaihna laiah inhrethiam tawn takin inhnûkhniam ve ve thei se a duhawm.