Sawhthing chak zawka lei a ṭul

Mizoram Agriculture Marketing Board chhinchhiah danin, Mizoram sorkar ruahman angin sawhthing lei leh hralhna tura ruahman secondary collection centre-ah April 5, 2026 thlengin sawhthing quintal 27,320.98 hralh/lei a ni a, hei hi nikum 2025-a lei zat aṭanga chhûtin 8.07% chauh a ni. SCC 64 zinga SCC 30-ah chauh lei niin, SCC 34-ah hralh leh lei a la awm lo.

Sorkar ruahman danin, kuminah February 2 aṭangin sawhthing lei ṭan tura tih a ni a, mahse, lei ṭan a ni lo a, chawlhkar khat vel hnuah lei ṭan a ni. An lei ṭan aṭangin thla hnih a liam tawh a, May 2026 thleng lei tura ruahman a nih avangin sawhthing lei nan thla hnih pawh hun a awm tawh lo.

Sawhthing lei hun bithliah zatve aia tam, thla hnih chuan hun a liam tawh laia qtl. 27,320.98 chiah lei a ni hi a tlem tak zet. Nikuma sorkarin a lei ang zat lei tur awm ta se, thla hnih chhungin nikuma lei zat hmun 100-a ṭhena hmun 8 chuang hret chauh lei a nih chuan, thla hnih pawh tling lo hun la awm chhung hian an lei zawh hman rin a har hle.

Sorkar ruahman anga sawhthing hralh/lei a la tlem lutuk hi a chhan a awm nual ang. Sawhthing thartute'n sorkar hmalakna nghâk hman loin sumdawngah an lo hralh nasa hman tawh a ni thei a; sorkar ruahmannaah a fuh tâwk lo a ni thei a; kalphungah hralh/lei zung zung theih loh chhan lian tak a awm a ni thei.

Sorkar ruahmanna hnuaia heti taka sawhthing hralh leh lei a muang hi a zialo a, sawhthing chíngtu tam tak an buai phah hlein a rinawm. Sorkar hian a khawi emaw laiah tih dan a thlak a ngai tih a chiang a, kut hnathawktute'n chak leh rang zawka sawhthing an hralh theih nan thuneitute hma la vat rawh se.

Thuneitute'n an remchanna leh awlsamna ringawt thlir loin, sawhthing neitu kut hnathawktute remchanna an ngai pawimawh tur a ni a, an buaina leh manganna an hriatthiampui tur a ni. Mizo lo neih danah hunbi a awm a; tunah sawhthing, buh leh thlai dangte chîn hun a ni leh tawh. Hengte hi thuneitute'n an zahsak a, ringthara an hna tibuai nasa lo zawnga ruahmanna an siam a ṭul a ni.