MUHCS leh kohhran thuchhuak

Mizoram Presbyterian Kohhran chuan an kohhran mi, khawsak harsatna vanga Mizoram Universal Healthcare Scheme-a inziak lut thei lote ṭanpui turin tualchhung kohhrante a ngen. Mizoram UPC pawhin MUHCS zawm vek turin an kohhrana thawkte an chah.

Synod Officers Meeting chuan, "Kohhran hoah an kohhran member-te retheihna vanga zawm thei lo, harsa zualte kohhranin an zawm theihna tura hma laksak tura ngenna siam ni se," tiin a rêl a; Synod Secretary-in kohhran tinah ngenna a thawn. Tualchhung kohhran ṭhenkhat chuan bawhzuiin, hma an la nia sawi a ni.

Mizoram sorkarin kum 2008 aṭang khan healthcare scheme a kalpui a; MUHCS bik chu April 1, 2025 khan kalpui niin, April 1, 2026 aṭangin a kum hnihna a kal mek. MUHCS-ah hian ṭha famkim tâwk lo a awm thei a; a ṭhat leh ṭhat lohah political party awmna zirin ngaihdan a inang lo thei bawk.

Kohhrante'n an hnuaia mite MUHCS zawm tura an chah te, kohhran mi zingah retheihna vanga inziak lut thei lote ṭanpui tura tualchhung kohhrante an inngen te, tualchhung kohhran ṭhenkhatin hma an la mek te hian MUHCS hi a ṭha hle a ni ang tih a rin theih. MUHCS zawm chungchangah kohhrante'n 'aw' an nei hi mi tam tak chuan ṭha an ti hle niin a hriat a; kohhran tih àwm loha an ngai pawh an awm mai thei.

Khawvel inher danglam zel angin kohhran rawngbawl dan pawh a inthlâk ve hret hret zel. Tun hmaa tih ṭhin ang zawng zawng kha tih vek a rem tawh lo a, tun hmaa la tih ngai loh tih ṭul ta pawh a awm thar zel. Chanchin ṭha hril chungchangah pawh, hmun tam takah chuan ṭawngkaa mi hnena sawi chiam kher loin, thil tih hmangin chanchin ṭha puan ṭhin a ni.

Retheihna vanga MUHCS-a inziak lut thei lote ṭanpui tura kohhrante inchah pawh hi thil tih àwm lo a ni lêm lo a, kohhran rawngbawlna remchang takah ngai thei ila a duhawm.

MUHCS-ah kohhrante'n beiseina lian tak an nei tih a chiang a, sorkar pawhin theihtawp a chhuah zui a ngai. MUHCS hi duan a nih ang taka tihhlawhtlin a nih theih nan inpekna thûk zawk nen sorkarin ṭan a lak a ngai a; kohhran leh mipui rinna hi a tihlawhchham thiang lo.