Municipal sum lapse-a inpuh tawnna

All Mizoram Village Council Association chuan 15th Finance Commission chhunga VC-te'n sum an hmuh tur nuai 36,200 chu 15th FC hunah an hmu kim tih sawiin, sorkar chungah an lawm thu press conference neiin an sawi.

Mizorama VC-te hian 15th FC aṭangin kum 2021-22 ah cheng nuai 6,900, kum 2022-23 ah nuai 7,100, kum 2023-24 ah nuai 7,200, kum 2024-25 ah nuai 7,600 leh kum 2025-26 ah nuai 7,400 an hmu a, a hunah an hmu vek niin AMVCA chuan press conference-ah an sawi a ni.

Hetihlai hian, Aizawl Municipal Corporation Mayor hlui chuan 1th FC-in AMC tana sum a ruahman Rs 15,26,60,000 leh Lunglei Municipal Council tana sum a ruahman, kum 2024-25 atan Rs 9,23,12,000 leh kum 2025-26 atana hmuh tur Rs 9,46,80,000 te chu sorkar laipuiah a kîr (lapse) niin a sawi.

VC leh LC te hian Finance Commission aṭangin sum an hmu ve ve ṭhin. VC-te'n 15th FC hun chhunga sum an hmuh tur an hmu kim ve thei hi a lawmawm a, a hunah sum hmuh a nih theih nan state sorkarin ṭha takin a bawhzui a nih a rinawm a, a lawmawm. Chutihrualin, municipal - AMC leh LMC sum hmuh tur zinga tam tham tak a lapse erawh a zialo a, a uiawm hle.

AMC leh LMC sum hmuh tur hmuh hman tâk loh chungchangah hian Aizawl Mayor hlui chuan state sorkar mawhpuhin, state sorkarin hma a lak chak loh vang a nih thu a sawi. Chutihlaiin, AMC-a corporator pakhat, state sorkara ruling party mi chuan municipal sum tur lapse chu state sorkar thiam loh ni loin, AMC sorkar thiam loh a nih thu a sawi thung.

Mizorama municipal pahnih sum hmuh tur a lapse nia sawi hi a dik turah ngai ila. A lapse chhanah hian state sorkar emaw, municipal sorkarte emaw, khawi emaw zawk zawk thiam loh a ni thei a; thiam lohna an nei ve ve mai thei bawk. A hmain sawi chhuah a ni ngai lo a, AMC inthlan dawn hnaiah sawi chhuah chauh a nih avangin politics khelhna atana sawi chhuah a ang viau.

Sum lapse hi politics khelhna atana hmang ringawt loin, hun lo la kal zel turah chuan municipal sum hmuhte a lapse tawh loh nan chak taka bawhzui zel ni tawh se; state sorkar leh municipal sorkar ten chak takin hma la ṭhin tawh rawh se.