Ṭawng tihchangtlun tuma hmalakna
Mizo Language Development Board (MLDB) Governing Body hotute April 9, 2026-a ṭhukhawm chuan Mizoṭawng tihhmasawna tihchangtlun dan turte an rêl.
MLDB hian ṭawng dang (English leh Hindi) thumal 131, Mizo ṭawng anga hman tawhte chu Mizo ṭawnga hman a, a sipel pawh Mizo ṭawnga ziah rawtna an pawm a, sap ṭawng (science lam) thumal Mizo ṭawnga seng luh atana rawtte an pawm.
A, AW, B hawrawp pumpui lam rîk dan, hman dan leh hawrawp indawt dan chungchang chu zir chiang turin Research & Documentation Committee kutah an dah a, thla khat chhungin MLDB-ah rawtna thehlut turin an ti. Thil dang eng emaw zat an rêl bawk.
MLDB hi Mizoram sorkarin Mizo ṭawng tihhmasawn, tihchangtlun, tihhausak a nih theih nan te, ziah dan inang tlang a awm theihna turtea a din a ni a; Mizo ṭawng chungchanga thuneihna bik nei a ni.
Mizote hian ṭawng dang, a bikin English leh Hindi thumal zingah Mizo ṭawng ang maia hman eng emaw zat kan nei a, kan la neih belh zel mai thei. Chu'ng hnam dang ṭawng, Mizo ṭawng ang maia kan hman tawhte Mizo ṭawnga seng luh tura MLDB-in an pawm hi thil ṭha tak a nih a rinawm.
Thuneihna rêng rêng hi hman sual theih a ni a, MLDB pawhin an thuneihna an hmang sual palh ve thei tho a, an fimkhur a ṭul a; Mizo ṭawng a pawimawh êm avangin an thuneihna hmang sual lo tura an inven a ngai.
MLDB member-te hian an duh dan ringawtin Mizo ṭawng tihdanglam an tum tur a ni lo. Mahni duh dan leh pawm dan aiin Mizo ṭawng hmasawnna tur an dah pawimawh zawk tur a ni a; mipui náwlpui sûkthlêk leh pawm dan te an thlir thiam tur a ni. Mi ngaihdan lak thiam a pawimawh a, chutihrualin, ngaihdan inang lo a tam avangin mi zawng zawng ngaihdan erawh lâk a ṭul chuang lo.
Mizo ṭawng leh hawrawp tihdanglam chungchangah fimkhur lehzual a ṭul a, ṭha viau tura kan ngaih hi mipuiin min pawmpui loh chuan a ṭha tluantling lo tihna a ni. Ṭawngah hian thuneihna hmangin 'hman tur' ti mah ila, mipuiin an hman duh loh chuan a hlawhtling tak tak thei lo. Chuvangin, MLDB hi Mizo ṭawng tihchangtlun tuma hma an laknaah an fimkhur tak zet a ṭul a ni.