Khualzin dawnsawn dan tur inzirtir

Tourism department enkawltu Minister leh official-te chuan April 10, 2026 khan Minister pisaah Central YMA hruaitute an kâwm a; Mizoram tlawhtu khualzin (tourist) an pun zel avangin khualzin dawnsawn leh, dawnsawn dan tur inzirtirna kalpuinaa thawhho dan tur an sawipui.

Minister chuan, Mizorama khualzin pung zel chu a lawmawm rualin, thil ṭha lo a ken tel theih avangin fimkhur a ṭul thu a sawi a, "Kan culture leh khawtlang nunphung tidal si loa mikhual kan lo dawnsawn a, inven ṭulnaah kan inven theih nan nasa taka zirtirna kalpui a ngai," a ti.

CYMA President pawhin khualzinte'n Mizoramah hun hlimawm tak hmang se an duh thu a sawi rualin, Mizoram mipui leh khualzinte hriat tur pawimawh, tih tur leh tih loh tur mumal tak siam ṭha an tih thu a sawi a ni.

Kan hriat angin Mizoramah state páwn lam khualzin an rawn lut tam sâwt viau a, media hrang hrangah Mizote chauh ni loin, hnam dangte'n Mizoram leh a chanchinte an pho lang nasa tawh hle. Hengte hi a lawmawm em em.

Media hrang hrangah Mizoram chanchin a tam tâk avang hian Mizoram tlawh châk an pung zel dawn a, khualzin rawn lut pawh an tam tial tial ngei ang. Chuvangin, hnam dang khualzin lo dawnsawn dan tur dik leh ṭha inzirtir hi Mizoram mipuite'n kan mamawh a, chutiang zawnga sorkara mawhphurtute leh pawl lian ber CYMA hruaitute'n a bul ṭanna atana sawihona an nei hi a lawmawm.

Tourism department leh CYMA hruaitute'n khualzin lo dawnsawn dan tur an sawiho hi tàwp mai lo a, tih dan tur kimchang zawka duangin, a takin mipuiah puangzar se a duhawm. YMA phei chu branch tin deuhthawa chanchinbu nei an ni a, chu'ng YMA branch chanchinbuahte chuan khualzin dawndawn dan tur te, khualzin laka awm dan turte inzirtirna tihchhuah ṭhin ni se a ṭangkai hle ang. Khualzinin an tlawh nasat hmun neitu khuaah nasa lehzuala inzirtir a ṭul bawk.

Mizote hi hmanlai aṭang tawhin mikhual laka nun mawi tak lantir ṭhin kan ni a; chu kan nihna chu kan ram rawn tlawhtu hnam dang khualzinte lakah pawh kan lantir zel a ṭha. Khualzinte laka awm dan tur dik leh ṭha kan hriat theih nan tih tur leh tih loh turte kan inzirtir thuai thuai a ngai e.