Media-a party-te incho tawn vel hi

Bawngkawna AMC Sport Complex siam dan chungchangah tun hnaiah political party-te ṭawngkamin an inbei nasa a; April 13, 2026 phei chuan party pahnih ṭhalaite'n a hmunah tlawhin, media ṭhenkhat hmaah thil awm dan nia an hriat an sawi ve ve.

AMC Sport Complex siam danah ZPM ṭhalaite chuan thil dik lo a awm ngeia an hriat thu leh, sum hman leh hnathawh a inmil lo hlea an hriat thu an sawi. MNF ṭhalaite erawh chuan thil dik lo a awm loh thu leh a nih dan tur ang taka siam a nih thu an sawi ve thung.

Bawngkawna AMC Sport Complex chungchang a rîk hluai chhan hi AMC inthlan dawn vangah a ngaih theih. Hei hi mi tam tak chuan an hre ve rânin a rinawm a; buaipui viautu party pahnihte hian AMC inthlanah an ṭhat phah eng em, tih chu ngaihtuah tham tak a ni.

Tun hma aṭang tawhin sorkar hmalaknaa thil dik lo nia sawi te, hnathawh ṭha lo nia political party-te'n an sawi ṭhinte hi politics-a inbeihnaah a tàwp duh viau. Dan ang taka hmalak emaw, tih ṭhat a nih theihna atana hmalakna tak tak emaw a awm lo ṭhin. Chu chuan a tihchian em em chu, thil dik lo leh ṭha lo vei tak tak si loin, politics-a inbeihna atan bâk hman an tum lo tih hi a ni. Politics-a inbeihna tam tak hi lemchanna mai a ni tih a lantir bawk.

AMC Sport Complex chungchangah pawh media-a incho tawn vel hi mipui tan chuan ho tak a ni a; a tak ram thleng pha tak tak si lo, boruaka inham puarna vel mai mai a ni. A tak ramah rah ṭha a chhuah sawi tur a váng hle.

Social media vela inham puar chiam te, thu dik tluan tling lo hmanga politics-a inbeihna te hi thil nihna dik tak hre pha ve tawh lo mipui rilru tibuaitu mai a ni. Inham puar chiam chiam hi politics khelh dan ze hlui a ni a, tunlaia GenZ an tih, ṭhalai zawkte chuan thu puarpawléng ni lo, thil nihna dik tak an hre duh tawh a, chu chu an zawng a ni tih hriat a hun. Politics khelh danah kan politician-te hi an inenfiah mawlh teh se.