Kângmeia laka invênah hma kan sâwn

India rama kum tina hman ṭhin Fire Service Week chu Mizoramah pawh kumin atan April 14 khan hman ṭan niin, Fire & Emergency Services hmunpuiah hawn a ni a, April 20, 2026 thleng hman a ni dawn.

Fire Service Week-in a tum ber chu, mipui vantlang leh mi tinte'n ni tin nunah, khawsaknaah leh chêt velna zawng zawngah kângmei tichhuak lo tura an fimkhur a, invên nacháng an hriat theihna tura inzirtir a ni.

Mizorama Fire Service Week hman tawhah kângmei laka invên a ṭulzia leh invên dan tur te, kângmeiin pawi a khawih nasat theihziate puanzar a ni ṭhin. Inzirtirnaah Fire & Emergency Services lamin an thawh hlâwk hle a, YMA pawhin an thawh hlâwk tak zet a; pawl dangte leh mimala ṭhahnemngai tak tak an awm bawk.

Kumin ṭhálah kângmei chhuak sawi thâwm hriat tur a tlem deuh niin a lang a, lo hâlnaah pawh mei chhuah an tlem niin a hriat; kângmei vanga thi leh hliam phei chu sawi a awm meuh lo. Kângmei tichhuak lo turin Mizoram mipui kan fimkhur tial tial a, a lawmawm hle.

Tun ṭhál laia kângmei chhuak leh kângmei vanga chhiatna lian tham sawi tur a tam lo hi chungchanga nasa taka inzirtirna lo tih tawh ṭhinte a hlawhtlinna pakhat a nih a rinawm a; Fire Service Week hman ṭhin hlawhtlinnaah pawh a ngaih theih àwm e.

In kâng leh ram kângte hi mihring fimkhur loh vanga kâng a ni thei a, vanduai vang liau liau a awm thei bawk. 'Fimkhur na nâ nâ chuan vanduaina pawh hi pumpelh theiha mual mual a awm' an lo ti ṭhin. Vanduai vang liau liaua kângmei chhuaka kan ngaihte pawh hi fimkhur lehzualna aṭangin pumpelh theihte a la awm ngei ang; mi tin kan fimkhur zual zel a ṭul.

Tunah hian ṭhál a la ni mek a, khua a ro viau. Kângmei laka invên a ngaih zual lai leh kângmei tichhuak lo tura fimkhur a ṭul zual lai a la ni reng. Kângmei laka fimkhur a ṭulzia te, invêng turin mi tinin mawhphurhna kan neih dante uar taka inzirtir zel ni se. Sorkar lama mawhphurhna nei thuneitute'n theihtawp chhuah zui zel se, mipui an fimkhur viau reng a ṭul bawk.