Zirlaite leh ṭhalaite kawng kawhhmuh

YMA, Bethlehem Vengthlang Branch chuan April 10, 2026 zan khan an venga pawl 10 leh 12 result nghak mekte tan 'Zirna kawng inkawhhmuhna' (career awareness) an buatsaih. He hunah hian HSLC leh HSSLC result nghak mek zirlai ṭhahnem tak an tel a, an venga officer pahnihte'n zirlaite kal zelna tura pawimawh, an tawnhriatte an sawi a ni.

Hun kal tawhah YMA branch ṭhenkhat chuan an venga zirlaite tan zirna sang zawk zir thei tura exam hmachhawn dan leh hna laknaa exam an thiam theih nan exam an lo buatsaih tawh ṭhin bawk.

YMA hi Zofate hmasawnna ngaihtuahtu a nih angin, zirna lamah Mizote'n hma kan sawn theih nan ṭhahnemngai taka beitu a ni. YMA branch ṭhenkhatin an branch huam chhunga zirlai naupang zawkte hma ngai a, hma an sawn theihna tura hma an la hi a lawmawm tak zet a, zirlaite pawhin hma an sawn phah ngei a rinawm.

Khaw tin leh veng tinah hian khawsak nuamsa tak tak an awm laiin, khawsak harsa tak tak tam tak an awm. Khawsak harsa deuh hlek aṭanga chawr chhuakte'n zirna lamah rualawt viau mah se, an neihin a tlin loh chin a awm ṭhin. Chung mite'n hma an sawn ve theihna tura YMA branch-te'n remchang an siam ṭhin hi a ṭha hle.

Zirlai zingah zirna sang zawk leh ṭha zawk thleng tura inbuatsaih hlei thei lo, a ngaihna hre lo, kawnghmang hre lo tam tak an awm; chung mite tan chuan remchang siamsak zel theih ni ṭhin se a duhawm. YMA branch hrang hrangte'n ṭan la lehzual se, a ti tawhte'n chhunzawm zel se, la ti ve ngai lote pawhin tih ve nachang hria se a duhawm.

Mizoramah industry lian a awm lo a, agriculture leh a kaihhnawih aṭanga deuh chhuah a tam tawk lo bawk; heng aṭang hi chuan state economy ṭhantir tak tak tura hmalak a harsa rih. Thiamna nei mihring chhawrtlak (human resource) neih ṭhat hi kan state economy tihṭhatna atana pawimawh ber pakhat a ni.

Zirna leh thiamna lama hmasawn te, hna thawktlaka mi chher chhuahte hi ram leh hnam tan a pawimawh em em. Sorkar mai bakah, kohhran, YMA leh pawl dangte'n tun aia nasain an huam chhunga zirlaite hmasawnna turin zau zawkin hma la se a duhawm.