Ni tin mamawh

Food, Civil Supplies & Consumer Affairs (FCSCA) secretary chuan, Citizenship Amend­ment Act (CAA) dodalnaa Assam-a buaina chhuak vangin mipui ni tin mamawh - eirawngbawlna gas, petrol, diesel leh buhfaiah tun dinhmunah chuan thlaphànna tur a awm loh thu a sawi. 

CAA avanga buai­na chhuakin nghawng a neih mekte leh a neih theihte avangin mi­pui an buai ru a, mi ṭhen­khat chuan hun rei tak rel leh motor kawng an dang dawn nia ngaiin a chhek khawl theih apiang an chhek khawl der tawh. Hetiang hunah hian Mizo ni si, Kristian ni bawk si, mahni tana mamawh tur piah lam thlenga midangte harsatna thlen lêt thei tur khawpa inhai vur a, invulh bik kan awm ṭhin hi a 

ṭha lo hle. 

Petrol leh diesel a la vang miah lo a, ‘A vang maithei,’ tih insawiṭhaih avang maiin a chuhin kan inchuh a, zankhaw tairek thlengin oil la tur lirthei an intlar. Chutihlaiin sorkar thuneitu lam chuan dan pangngaiin oil-te hi a lo la lut reng tih an sawi a, keimahni leh keimahni harsatna insiam zawnga kan tâl chiam ṭhin hi a pawi takzet a ni. 

Mizoramin hun­pui kan hmachhawn dawnlai taka buaina a awm avangin mi­pui hi an chiai hle niin a lang a, hetih hun­laia FCSCA lamin mipuite thlamuan­na tur thu sawi tur an nei hi a lawmawm hle. Mizoram mipuite’n him leh hlim taka Krismas leh Kumthar kan lawm theihna turin kan sorkar thuneitu lamin ṭan han la zel se a lawmawm khawp ang.