AR hmun hluia hmalakna leh thing kih

Aizawl khawpui lailia Assam Rifles battalion hmun ruak taah Mizoram sorkarin ruahmanna mumal tak neiin hma a la a, hna thawh ṭan niin, thing ṭhenkhat kih a ni tawh. Thing kih a ni hi duh loin Centre for Environment and Social Justice chuan April 15, 2026 khan hnathawktute tibuaiin an dang a, thing kih zel tur an veng zui.

Mizoram Transformation Movement pawhin thuchhuah siamin, thing eng emaw zat kih tum a ni chu pawi an ti a, thing upa leh hlu bikte chu zuah ni se an duh thu an puang.

AR hmun hluia hmasawnna hna thawhna tura thing kih leh chumi dodalna hian sawi zui a hlawh hle. Thing kih duh lo hrim hrim an awm rualin, khawpui hmasawnna tura thing kih ṭhen pawiti lo tam tak an awm. Social media-a sawi zuina aṭanga teh chuan, hmasawnna tura thing ṭhenkhat kih hi thláwp an tam zawk hle niin a lang.

Thing kih duh lote ṭan chhan hi an thlirna aṭang chuan a dik viau ang. Khawpuiin hma a sawnna tur ngaihtuaha sorkarin hma a laknaah pawh ruahmanna mumal tak siam a ni a, a páwng ataka thing kit an ni bik lo ang.

Kan ramah environment humhalh duha hma latu pawl an awm nual a, an ṭhahnemngaihna a lawmawm. Mahse, heng pawlte hi an thawkho hleithei loa sawi a ni a, ngaihtuah an tithui. Environment humhalh duh anga an lanna phênah hian thil dang, hamṭhatna lak tumna a awm em ni, tia ngaihtuah theih tak a ni.

AR hmun hluia hmalaknaah hian sorkar hian thing kit tlem thei ang berin hma la se, thing puitling leh hlu bikte erawh zuah theih a nih chuan zuah hrâm thei se. Thing kih duh lote pawhin pawtawk taka sorkar hmalakna dodal mai loin, hmasawnna hna thawhnaah thing kih a ṭul ve ṭhin tih an hriatthiam a ngai a ni.

Thil rêng rêngah ngaihdan leh duh dan a inang vek thei lo. Pawl pakhat emaw, pawl ṭhenkhat emaw duh dan ringawtin ram leh hnam a kal thei lo a, a kal tur pawh a ni lo. Pawl leh mi ṭhenkhat duh dan hi pawl dang leh mi dangte duh dan a ni kher lo thei. A ṭawng tam tam, a luruh ring ringte ngaihdan leh duh danin kan ram leh hnam hi kal tur a ni lo.