The Mizoram Maintenance of Household Register Bill

March 18, 2019-a Mizoram Legislative Assembly-in a pass tawh The Mizoram Maintenance of Household Register Bill chu Governor-in a la pawmpui loh avangin dan a la tling lo a; Chief minister chuan tun hnai khan prime minister hmu­in The Mizoram Main­tenance of Household Register Bill chu a rang lama dan puitlinga siama hman a nih theih nan hma lâkpui turin a ngen. 

Ram chhung mi dik tak hriat theihna tura The Mizoram Maintenance of Household Register Bill duan a nih khan bill dangte ang bawkin Larsap-in a pawmpui ve mai tura ngaih a ni a; nimahsela tun thlengin Larsap pawmpuina a la awm loh avangin dan pangngai anga hman theih a la ni lo. 

Larsap pawmpuina (assent) a awm chuan, he dan thar hnuaiah hian Mizoram khua leh tui dik takte ṭha taka chhinchhiah fel theih an ni ang a, chu chu kawng hrang hrangah chhawrna tur a awm ngei ang. Tunah hi chuan kil tin aṭanga pem lut an awm ve reng a, a ṭhen state pawn lam mi an ni a, a ṭhen ram pawn lam mi an ni a, chhinchhiahna fel tak a awm loh avangin harsatna pawh a awm fo tawh a ni. State tana dan ṭha tak ni thei tura lang The Mizoram Main­tenance of Household Register Bill-in Lar­sap pawmpuina a la nei thei tlat lo mai hi a mak a, kan state chhunga bill pass ni si Larsap-in a pawm theihna tura prime minister-te hial pun a ngai kawi ta duah hian ngaihtuah a tithui hle. 

Engpawhnise Mizoram tana ṭha ber tura ngaiin kan ram hruaitu rualin nikum March-a an lo pass fel tawh kha a ni a, tun thlenga dan a la chang thei lo hi a mak zozai tawh a, The Mizoram Maintenance of House­hold Register Bill hi a tak chang turin Larsap hian pawmpui thuai se a ṭha khawp mai.