Khualzin hip kan tum tak tak em?

Tourism department chuan tun hnaiah Lammualah Winter Festival 2019 an huaihawt a, he hun hawngtu deputy chief minister chuan Winter Festival chu Mizo sakhuana nen inmila ruahman a ni tih sawiin, "Mizoram hi khualzin tam zawkin an tlawh theih turin sorkarin hma a la a, mipui pawhin páwn lam aṭanga Mizoram tlawhtu khualzinte ṭha taka lo dawngsawng ṭhin turin kan rilru leh nunphung kan buatsaih a pawi­mawh," a ti a; Tourism minister chuan kum dangah inbuatsaihna ṭha zawk nen Winter Festival chu hman zel tur a nih thu a sawi.

Mizoramah hian kan kut neih sa leh kut siam belh (phuah belh) hmanga khualzin hip hi kan sawi ṭhin a; nimahsela a nihna dik tak kan sawi chhuak duh a nih chuan heng kan kut leh kut siam belhte hian khualzin tih tham a hip lo a, sum leh paia hlawkna tur khawp phei chu khualzin an awm lo. Kan sorkar neih tawhten Tourism department an kalpui danah tihfuh tawk lo an nei tih chianna chu kan ṭhenawm state-in an hausakpui tourism hi kan ramah chuan pawisa senna mai a la ni a, sorkar tan sum laluttu a la ni meuh lo. 

Sorkarin kan kut neih sa Chapchar Kut atan pawisa tam zawkte dahin Anthurium Festival te a siam belh a, tun hnaiah department dangin Pawl Kut an han buatsaih ve bawk a, Winter Festival-te kan ti zel a; heng kan kut buatsaihte hi keimahni intihhlimna tur a nih chuan a tha mai a, khualzin hipna tur anga kan sawi a nih chuan a tum kan la thleng phak lo hle tih zep rual a ni lo. Kan kut hman thinte hi Aizawla Lam­mualah deuh vek kan hmang a, Lam­mual pawn lama kan hman chhun pawh a programme kal­phung a danglam tam lo. Chapchar Kut a ni emaw, tun hnaia an phuah belh Winter Festival leh Anthurium Festival-te pawh ni se kal­phung ngai deuh pet pet veka tih a ni a, heti lo deuha kal theih dan hi awm se a tha ngawt ang.

Khualzin hip kan tum tak tak a nih phei chuan khawpui chhunga khelmual pakhata lam leh zai ringawt hi chuan a hip meuh dawn lo a, intihhlim mup mupna ang lekah kan la chhuah rih a ni ber mai. Kan hruaituten kum dangah pawh Winter Festival hi hman zel an tum a nih chuan ngaihtuahna zau zawk nena khualzin hip thei turin kalpui se, chutiang tur chuan ruahmanna fing zawk nen hma han la sauh sauh teh se.