Tlin lohna hi insiamṭhat nan hman ni se

Aizawl Municipal Corporation inthlan vote chhiar a ni a, political party leh candidate zingah tling leh tling lote an awm. Tling zo ta lo party hruaitute'n tling tate an lawmpui thu leh duhsakna an hlan thu an sawi chhuak hlawm.

Candidate zingah pawh tling leh tling lo eng emaw zatin social media kaltlangin Pathian leh mipui hnena lawmthu sawina an tichhuak a; thlan tlinte'n an hneh tâk tling zo ta lote an tawrhpui thu te, tling zo ta lote'n thlan tlinte an lawmpuina leh duhsakna thu an tichhuak a ni.

AMC inthlana tling zo ta lo political party hruaitute leh candidate ten thlan tlinte leh sorkar siam turte lawmpuina leh duhsakna thu an sawi chhuak hi a lawmawm a, a mawi hle. Inthlan campaign laiin na tak takin han inbei ṭhin bawk mah se, thinlung chhung ril takah chuan rilru ṭha tak an pu niin a hriat.

Political party hruaitute'n AMC-a sorkarna siam theia chak party an lawmpui thu an sawi pahin AMC sorkar kal dan turah beiseina sang tak an neih thu an sawi tel hlawm. Eptu party-te sawi a nih avanga ngaihthah mai loin, an beisei ang ngeiin rorel turte'n rorelna dik leh ṭha nen hma an lak a ngai.

Candidate zinga tling zo ta lote'n tun AMC inthlan hi an tawpna tur a ni lo tih hria se; politics hi ram rawngbawlna, ram hmasawnna rahbi tukna tura hna thawhna pawimawh tak a ni tih pawm thlap chungin ram leh hnam tan theihtawp chhuah zui zel se a duhawm.

Tlin lohna hi inenfiahna atan hman thiam a ṭha. Inthlan campaign danah te, hun kal tawha chêt danah te, mipuiin an hnâwl chhanah te inenfiahna tur tam tak a awm ngei ang. An tlin lohna aṭangin mipuiin rorel tura an duh leh theihna turin insiamṭhat nan hman tum se a ṭha hle; chu chu anmahni bakah, ram leh mipui tana hlâwkna tur a ni ang.

AMC-a sorkarna siam turte pawhin inthlan dawna an intiam ang ngeiin dikna, rinawmna, taimakna leh tih tak takna nen rorel se. Anmahniah mipuiin beiseina sang tak neiin rorelna ṭhutthleng an chantir a ni tih hriain, khawpui leh mipui hmasawnna turin theihtawp chhuah ngei rawh se.