Pung chak turin ṭhalaite an pawimawh

Minister pakhat chuan April 29, 2026 zana NE Khawdungseia YMA Sub-Headquarters, Saitual inkhawmpuiah, Mizote pun chak a ṭul thu leh chumi tur chuan nupui pasal innei hma tura infuih thar a ṭul thu a sawi.

Mizoram mipui, a bik takin Mizote hi kum eng emaw ti aṭang khan kan pung chak loa sawi a ni. Nupa tuak khatin fa pahnih an neih hian pung loin ngai an awh a, fa pathum chinah an pung a, fa pakhat chauh an neih chuan kiam lam an pana ngaih a nih thu sawi ṭhin a ni.

Mizo hi hnam tlêm kan ni a, Mizoram zîm tê pawh kan la luah khat lo hle a, India rama mihring thâwlna ber state zinga mi a ni. Hnam tlem an chak thei lo a, tun aia kan pun chak a, hnam lian zawk nih theih a ṭha a; a ṭhatna tam tak a awm.

Pung chak tura pawimawh chu nupui pasal neih hma a ni a; Minister-in pun chak kan mamawh thu leh nupui pasal nei tura infuih kan mamawh thu a sawi hi a àwm viau. Hemi chungchang hi ṭhalaite'n an ngaih pawimawh a ṭul.

Tunlaiah Mizo zingah nupui pasal nei mai lo an tam ta viau a, kan pun chak loh chhan pakhat a ni ang. Upat lamah chuan, a bikin hmeichhiain pasal nei mah se, fa neih an harsata sawi a ni a; hmeichhe tan kawppui neih hma deuh a pawimawh zual.

Nupui pasal neih hma tih hian, naupang lutuka nei tura infuihna lam a kâwk lo. Nau pâi theih hun chhung a awm avangin, nau an pâi theih laia fa an hrin tam zawk theih nan innei hma deuh tura infuihna a ni.

Nupui pasal neih mai loh chhan ṭha tak a awm thei a, táwngpáwng innawr lutuk a fuh ber lo thei a, inhriatthiampui a ṭha. Ngaihsak lo hrim hrim te, duh loa tum lo hrim hrim te pawh an awm thei a; khawsak nawmna thlakhlelh vang leh mi ina mo peih loh vanga pasal nei lote pawh an awma sawi a ni fo - hei hi chu a ṭha lo.

Pathianin inthlah pung tura a siamte kan ni. Kan chhungkua ṭheuh hian zuih lam kan pan loh nan ṭhalaite'n inthlah pun chak duhna rilru an put a hun viau. Nupui pasal neih hma deuh leh fa neih tam a ṭhatna, infuihna lam hi ram, kohhran leh khawtlang hruaitute'n sawi tam zel se a ṭha hle ang.