Sorkar laka helna leh hmasawnna

Mizoram sorkar leh HPC-D (LF) te chuan April 14, 2026 khan Sakawrdaiah inremna an ziak. Inremna angin April 30, 2026 khan HPC-D (LF)-te'n an ralthuamte Mizoram sorkarah an hlân a; Chief Minister-in cheng nuai 129 a hlan ve bawk.

Mizoramah hun rei tak HPC-D (LF) thâwm hriat a ni tawh lo a, tun hnaia sorkar nen inremna an ziah khan mi tam takin an hriat thar lehna a ni hial mai thei. Mipui pawhin an hriat vak lohte sorkarin inremna a ziahpui kha mi tam tak chuan mak an ti zawk hialin a rinawm.

Thâwm nei vak tawh lo pawh ni se, sorkar laka hel hming pú an la nih tho avangin sorkarin duhsak taka inremna a siampui leh anmahni chhawmdawlna atana sum tam tham tak a ruahman hi a lawmawm. Sorkar leh HPC-D (LF) tan a lawmawm ve ve a, HPC-D (LF)-te tan a lawmawm lehzualin a rinawm.

Sorkar laka hela silai lekna hi Mizoramah a lo awm tawh ṭhin a, India ram state dangah pawh a awm ṭhin. Mizorama hel pawl an awm chhan lian tak pakhat chu, hmasawnnain a thlen phak loh vang leh hmasawnna ṭha zawk an duh vang niin a lang.

Chutihrualin, hmasawnna hi ralthuam leka nawr chhuah chi a ni em tih hi ngaihtuah tham tak a ni. Hel pawla telte chuan anmahni bikah sum leh pa leh in leh lo chungchangah hlâwkpuina an lo nei a nih pawhin, an awmna bialah hmasawnna a thlen chiah em tih hi ngaihtuah tham a ni. Hel awm loin, ralmuang takin hmasawnna hna thawh theih ni se, hmasawnna a chak zawk mah thei àwm e.

Ralthuam lek hi a ṭha lo a, nunna hi a hlut em avangin mi nunna lak duh khawpa ralthuam lek a ṭha lo. Ralthuam lek an awm chuan ram a rálmuang lo a, mipui an thlamuang lo ṭhin.

'India rama state ralmuang ber' tia sawi ṭhin Mizoramah hian khawtlang nun a rálmuan a, mipui an thlamuan theih nan mi tin kan pawimawh. Hel pawl leh ralthuam lek an awm tawh loh nan rilru dik kan put a, remna leh muanna hlutzia kan hriata kan ngaih pawimawh a ṭul a; hmun tinah hmasawnna rualkhai taka a thlen theih nan sorkarin hma a lak a ṭul bawk.