Tlawng tui nú - harh chhuah a hun

Public Health Engineering Minister chuan, tun hnaia ruahsur vangin Tlawng lui tui a nu nasa a, chuvang chuan tui pump a khaihlak ṭhin thu a sawi.

PHE Minister sawi danin, tihfîm theih loh khawpa Tlawng tui tui a nut avangin April 26 leh May 2 inkarah GAWSS Phase I&II-ah tui an pump ṭhin hunah darkar 46:08 chhung tui pump theih a ni lo. Phase III-ah darkar 44:32 chhunga tui pump theih a ni lo bawk a, Phase III aṭanga tui pump theih loh zat chu litre nuai 357.60 a ni.

Kan hriat ṭheuh angin Aizawl mipuiin kan mamawh tinrêng atana tui kan tlan ber chu Tlawng lui tui a ni. Chutihlaiin, sorkar leh mipui hian Tlawng lui hi kan duat lo em em a, kan tiduhdah hle tih a hriat. Inenfiah kan ngai takmeuh.

Tlawng tui nut nasat lutuk chhan hi zawng dawn ila, rilruah lo lang nghal a awm; chu chu Aizawl tlâk lama khawpui hêlna tur kawngpui, Aizawl Western-side By-pass Road sial mek a ni. A chhan dang pawh a awm thei a, mahse, kawngpui thar sial mek hi a chhan lian ber a nih a rinawm.

Leilung leh a chhunga awm thil tinrengte humhalh duhtu mi ṭhenkhat chuan Aizawl Western-side By-pass Road sial mekah hna thawkutte'n leivungte kawng thlangah an paih nasat thu leh tihtawp an duh thu an lo tlangaupui tawh ṭhin. Sorkarin hma la ve bawk mah se, kawng thlanga leivûng paih hi tihtawp a ni tak tak lo a; rin lâwk ang ngeiin Aizawl mipuiin kan tuar chho ta rêng niin a lang.

Kan nunna atana pawimawh em em, ei leh in leh thil chi tinrênga kan hman Tlawng lui kan sawisak dan hi a zialo tak zet a, keimahni ngei hi harsatna kan insiam a ni ber. Tlawng lui pawimawhzia hria a, tibawlhhlawhtu leh tinutu ni lo tura kan harh chhuah a hun tawh tak zet.

Dan loa leivûng paih dodaltu mimal emaw, pawl emaw awm bawk mah se, thuneihna nei an ni lo a, thuneihna neitu chu sorkar a ni. Leivûng paihin Tlawng lui a tihnut vanga mipuiin tuiah harsatna kan tawh tawh loh nan sorkar hian awmze nei tak tak turin hma la mawlh teh se.