Krismas chibai

Vawiin (December 21, 2019) hi kum 2019 chhunga Vanglaini chanchinbu chhuah hnuhnun ber a lo ni leh ta a, kum tharah January 4 aṭangin chhuah ṭan leh a ni ang. 

Kum danga kan tih ṭhin ang bawkin Krismas leh kum thar vuakvetah chanchinbu chawlh kan hmang leh dawn a, chawlh chhung pawh a rei hle. Chan­­chinbu chawlh hman hi mi tam takin an sawisel ṭhin a, chawlh hmang loa kum tluana chhuah an duh ṭhin a, he ngaihdan hi a dik hle. Tun dinhmunah erawh chuan kan kalphung hian a la zir tawk lo a, chanchinbu semtu tam tak Krismas hmangin an zin bo a, an hna pawh an thawk tluan thei lo. Chumi piah lamah chuan Aizawl pawna chanchinbu thawn chhuahna lirtheite an tlan lo a, thawn chhuah theih a ni lo a; hnathawktute pawhin chawlh hman an thlahlel ve bawk nen kum dang ang bawkin chawlh kan hmang leh dawn ta a ni. 

Hetihlai hian kan kalphung hi kawng tam takah a inthlak chho ve mek zel a, chanchinbu kalphungte pawh zawi zawiin a inthlak danglam hret hret a. Hunpui laia chawlh hmang loa chanchinbu chhuah tlang hunte pawh hi kan hmaah hi chuan a la awm ngeiin a rinawm a, chumi atan chuan hnathawktu lam pawh an inbuatsaih a ngai ang. Mipuiin chawlh an hmang a, chanchinbu chhiarna hun thawl ṭha an neih lai taka an chhiar tur pek theih hun a nghahhlelhawm hle. 

Nitin maia chan­chin ziak kan ni a, kum tluana hna­thawk kan nih avangin tihsual palh leh hriat fuh tawk loh thil tam tak kan nei ngei ang, chhiartute hriatthiamna kan ngen rualin an rawtna pawh kan ngaithla peih reng e. Engpawhnise Pathian venna zarah kumin atan chanchinbu chhuah hun hnuhnung ber a lo ni ta. Vanglaini chhiartu zawng zawngte hlim leh lawm taka Krismas hmang turin duhsakna kan hlan a che u.