Chi bil leh hmun bik tana hmalak loh
HPC-D(LF)-te'n sorkara an ralthuamte an hlanna inkhawm, April 30, 2026-a neihah Chief Minister-in Sialkal Range Development Council (SRDC) chu khaw paruk chauh huam loin, khaw 15 huamtir tura hmalak mek a nih thu a sawi.
Mizoramah hian huam chin (area) bik nei council/committee a awm nual. District council pathum kan nei a, sorkar laipuiin a siam a ni a, hnam/chi bil hming pú vek a ni. Mizoram sorkarin a din - Lunglei High Powered Committee, Sinlung Hills Council (a hmain Sinlung Hills Development Council) leh Sialkal Range Development Council te a awm.
CM-in a sawi angin, SRDC huam chin zauh a, khaw 15 huam tura tihlen hi a huam chhunga khua leh mipui tan chuan a ṭhain a lawmawm viau ang. Chutihrualin, Mizoram hmun dang zawnga mite tan chuan a lawmawm ve kher lo mai thei a; a bikin thingtlang hmun danga mite tan thîk theih tak a ni ang.
Mizo hnam péng ṭhenkhat tinzâwn bika ngaih theiha khawi bial emawa council/committee din hian ṭhatna a neih rualin, a huam páwn lam zawnga mite leh state pum tan a ṭha lo zawk ve thei. Hmun danga mite'n duhin phût ve ta sup sup se, sorkar tan a buaithlak hle ang a, phurrit a ni thei. Mizo ang leh Mizoram pum anga inlungrual lohna thlen thei a ni bawk.
Hnam leh chi bil emaw, khawi hmun emaw bik tana council/committee din ṭhin hi tih tawh loh ni se a duhawm. Chutihrualin, hnufual bika inngaihna leh ngaihsak bik ngai nia inhriatna rilru mipuiin an put loh nan Mizoramah hmasawnna rualkhai tak a awm a ṭul a; hmun kilkhâwr tak thlengin a àwm tâwk leh mipuiin an pawm theih tâwk hmasawnna a thlen a ngai.
Hnam bil, chi bil hawia ngaih theih hmun bik tihhmasawn tumna hian ram mipui inlungrual lohna a thlen thei a, hnam inpumkhatna a tichhe thei. Ram leh hnam pumpui thlir chunga hmalak ṭhin a pawimawh. Council/committee din kher loin, Mizoram chhunga tihhmasawn ngai laite chu sorkar hian ngaihsak bikah nei se, tihhmasawn an ngaihna laiah hma la uar mai ṭhin se a ṭha zawk mahin a rinawm.
February 23, 2026-a Assembly House-a sawiho tawh SRDC Bill, 2026 pawh kha pass a la ni lo bawk a, pharh zui tawh loin, hnuhkîr a ṭha zawk mai thei e.