Sawhthing lei/hralhah ṭan lehzual a ngai

Mizoram sorkarin sawhthing lei/hralh a buaipuiah kumin 2026 bikah May 4, 2026 thleng khan secondary collection centre-ah sumdawngte'n sawhthing kg 90,78,720.03 (quintal 90,787.20) an lei tawh. Tun karah sawhthing leitu sumdawngte'n Mizoram sorkarin rate a bituk kg-ah Rs 50 aia sangin lilâm an chháng.

Sumdawngte'n Mizoram sorkarin sawhthing man a bithliah aia sanga lei tuma lilâm an chhâng hi a lawmawm. Sawhthing chíngtu, hralh tur la neite'n an hlâwkpui lehzual dawn niin a lang a, a lawmawm hle.

Sorkar kaihruai mektute'n sorkarna an chelh hma khan sawhthing man a san lai chuan kg-ah Rs 100 vel a kai châng a awma sawi a ni. Mahse, sawhthing man a san viau hun hi a rei lo a, kum hnih/khat bak a ni loa sawi a ni. Kum/hun tam berah chuan sawhthing man a sang lo tlangpui.

Tunah chuan sorkarin sawhthing man hniam ber tur a siam a, sorkar rate bituk anga sawhthing leitute'n an lei ngam lo a nih pawhin, rate bituk a tlin lohna chu sorkarin sawhthing neitute a pe leh ṭhin. Sawhthing thartu, sorkar ruahman anga hralhtute chuan kg-ah Rs 50-in an hralh zel tihna a ni.

Sumdawngte'n Mizoram sorkar rate bituk aia sanga sawhthing lei tuma lilâm an chhâng hi a lawmawm êm avangin, hetiang hi a nih zel theih nan thuneitute aṭanga hmalak dan awm se a duhawm. Rate a ṭhat zel theih nan thuneitute'n ṭan la zel teh se.

Hetihlai hian, kumina sorkar ruahman anga May 4 thlenga sawhthing hralh tawh zat kg 90,78,720.03 hi a la tam lo viau a, nikum 2025-a hralh zat kg 3,38,35,182 (qtl 3,38,351.82) aṭangin 26.83% chauh a ni a, a la tlem hle.

Kumin hian sorkar ruahmannaa sawhthing hralh leh leiah thil tih zung zung a harsat avangin, sorkar ruahmanna páwn lama sawhthing hralh eng emaw zat an awm. Sorkar páwn lama sawhthing hralh zat leh, SCC-a sawhthing hralh tur la awm zat hriat a harsa. SCC kaltlanga sawhthing hralh/lei hun hi tun May 2026 tàwp thleng tura ruahman a ni a, Pathianni chhiar tel lohin ni 20 chiah a awm tawh.

Sawhthing hralh hun a tàwp hnaih tawh avangin inthlahdah hman a ni tawh lo a, muangchàn chi a ni tawh lo. Kumina sawhthing hralh duh zawng zawngte'n an hralh hman vek theih nan sorkara thuneitute'n theihtawp an chhuah a ṭul tak zet tawh a ni.