Year of Discipline a taka tihhlawhtlin

Mizoram Police chuan sorkar kum kal mek 2026-27 chu 'Year of Discipline' atan an puang a, May 6, 2026 khan Home Minister-in a hawng.

Year of Discipline hawngtu Home Minister chuan, police-te kumpuan chu thu maia inham puarna ni loin, a taka tihhlawhtlin ni se a duh thu te, inthununna chu police tan innghahna lungphûm a nih thu te, inthununna ṭha lo leh inthlahdah chu police-te hmelma lian a nih thu te a sawi.

Mizoram Police-in kumpuan atana Year of Discipline an nei hi a lawmawm. Police-te 'Year of Discipline' hi lan mawi tumna maia tih ni loin, a taka tihhlawhtling ngei ni rawh se. Tihhlawhtlin a nih theih nan theihtawp chhuah se, taimakna, inpekna leh thuawihna nen bawhzui a ṭul dawn a; a lú ber aṭanga a hniam ber thlengin mahni ṭheuhah insiamṭhat duhna rilru an put a ṭul ang.

Inthununna ṭha awm lohna hmunah chuan buaina leh harsatna a tam ṭhin a, mipui leh vantlang nunphung a mumal lo ṭhin. Mipui leh khawtlang rálmuanna a tlahniam a; nunau, chak lo zawk leh khawsak harsa zawkte tan a hrehawm ṭhin.

Mizoram Police 'Year of Discipline' hi tihhlawhltin a nih ngat chuan kan police-teah hmél thar mawi leh ṭha lehzual a thleng ngeiin a rinawm. Kumpuan avanga police ṭha zawk, inkaihhruaina leh inthununna ṭha zawk kan neih phah a nih ngat chuan, anmahni police mai bakah, sorkar leh mipui tan, ram leh hnam tan a hlu hle dawn.

Inthununna ṭhaah chuan hun vawn dik a ni ṭhin a, hnaah mi rinawmna ṭhin a, nungchang mawi leh ṭha a lang chhuak ṭhin. Rinawmna chuan mihringah mawhphurhna ṭha taka hlen chhuah duhna a thlen a, chu chu ram leh hnam kal zel atana thil ṭha, mi tinin mamawh a ni.

Inthununna ṭha hi kawng tinrêngah a pawimawh em em. Chuvang chuan, sorkar department dangahte pawh kumpuan anga an hmang kher lo a nih pawhin, ngai pawimawh ber zingah nei vek thei se a duhawm. Chutiang bawkin mimal, chhungkua, khawtlang, kohhran leh pawl tan pawh inthununna ṭha a pawimawh em em a; inthununna ṭha nei turin inkaihhruaia insiamṭhat a ṭul hle a ni.