MPSC an fimkhur lehzual a ṭul

National Students Union of India (NSUI) Mizoram State chuan, Mizoram Public Service Commission (MPSC)-in tun hnai kum khat chuang hret chhungin thil tihsual tam tak an nei a, siamṭhatna (corrigendum) 15 an tichhuak tawh tih an sawi a; MPSC chu insiamṭha tura an phût bakah, Mizoram sorkar chu nasa lehzuala thuam chak turin an ngen.

MPSC hian May 13, 2026 khan MES (Combined Competitive) Examination 2025 result a tichhuak. Electrical & Electronic Engineering-ah post sarih lak turah mi pariat an tihtlin avangin May 14, 2026 khan thupha chawina Press Note an tichhuak a; result tihchhuah tawh chu siamṭhat a ngaih thu an tarlang.

February 2, 2026-a MCS (Combined Competitive) Exam 2025 result an tichhuak a; tlinga puan tawh pakhat chu Mizoram páwn lam mi a nih avangin result an siamṭha leh a, Mizoram pâwn lam mi chu hnâwl zui a ni. Heng bakah hian tihsual dang - eng emaw zat a awma sawi a ni bawk.

MPSC hi sorkar hnathawk tur, a sang lamte lakna buaipuitu a ni a, a pawimawh a, hotute leh thawktute pawh an pawimawh tak zet. Tihsual an nei fo hi a zialo tak zet a, a mualphothlak. Heng tihsualteah hian 'fimkhur tâwk loh vang' tih bâk chu a chhan puh tur a awm lo.

MPSC hian tihsual a neih fo a, tihdikna leh thupha chawina a tihchhuah fo chuan miin an rinna a tlahniam ngei ang. Sorkar hnathawk tur lakna chi hrang hrang dik taka ti tura beisei an nih laia dik lo a awm fo chuan, a bik takin ṭhalaite tan a pawi hle dawn.

MPSC hian thuvawnah, 'A dik chauh ni loin, a lang dik tur a ni' tih a neia sawi a ni. An thuvawn ang tak hian, MPSC hian dik takin an ti a ni tih mipuiin an pawm theih khawpin dik takin, tihsual awm loin an ti ṭhin tur a ni.

'Mihring ve bawk kan ni a, thil tisual ve thei kan ni' tih hi chhuanlamah leh inhnem nan hman a ni fo; mahse, hei hi thiam inchantirna tur a ni lo. MPSC-ah hian mipuiin engkim dik thlap vek an beisei a, fimkhur theihtawpin an thawkin an ti tur a ni a; chu chu mipui beisei dan a ni.