Political campaign intiamna

MNF vice president Dr R Lalthangliana chuan, November 5, 2019-a Sinlung Hills Council (SHC) inthlanah MNF thlan tlin a nih chuan, SHC headquarters chu Sakawrdai-ah dah a nih tur thu a sawi a; SHC headquarters Aizawla awm daih chu a inhmeh loh thu leh dawr a harsat thu a sawi. 

MNF vice presi­dent sawi ang hian SHC hmunpui ber an area pawna a awm daih mai hi kawng tam takah harsatna an tawh phah ngei ang a, a dawrtute tan pawh a buaithlak chang a awm fo ang. Chutihlaiin Aizawla a awm avanga kawng ṭhenkhata a ṭangkai zawk dan leh office hnathawh zung zung a awlsam zawk dante pawh a awm thei ang. 

Engpawhnise SHC hmunpui ber hi an area chhung ngeia awm hi a inhmeh a, hei hi MNF vice president ngaihdan pawh a ni. A sawi ang hian SHC enkawlna hi chu state sorkar kut a nih avangin SHC hi an duhsak tak tak a nih chuan an headquarters hi a ṭangkaina tur taka an sawi, Sakawrdaia dah hi Mizoram sorkar hian a ti thei reng a, inthlan nghak kher lo pawhin an duh phawt chuan an dah thei ang. Chumi piah lamah SHC inthlana MNF leh an lam ṭang an tlin chauha Sakawrdaia SHC headquarters dah an tum a nih chuan Mizoram hruaitu thusawiah a inhmeh lo. An tling emaw tling lo emaw SHC area chhunga mipuite an duhsakna lantirna atan an dah zawk tur a nih hmel. 

Inthlan dawnah ṭhahnemngai takin mahni political party tan kan campaign tur a ni a, nimahsela ram hruaina vawnfung chelh mektute'n sorkarin mipui laka a thil tih tura an sawi hi an fimkhur a ṭha khawp mai. Sorkar hian SHC headquarters hmun danga awm hi a ngaimawh tak tak a nih chuan, he SHC inthlanah hian tu pawh tling se Sakawrdai lama SHC hmunpui dah hi an kal tlangpui tho tur a ni dawn lo'm ni?