Territorial Army bawhzui chak ni se

Mizo Territorial Army (Home & Hearth) 166 Infantry Battalion-a lut thar mi 144-te chu May 11, 2026 khan Chief Minister-in a vailiam a; an training-na tur hmunah hun an hmang mek. Mizo ṭhalai lut hmasa berte mi 144-te hi mipa 135 leh hmeichhia pakua an ni.

Territorial Army (TA) din chungchangah political party ṭhenkhat chu thangṭhat lak tumin an lo buai a. Rorel lai party-in CM-in sorkar laipui hotute dawra a nawrna vanga hlawhtling ta a nih thu an sawi laiin, eptu party pakhat chuan an hun laia hmalak ṭan tawh a nih thu an sawi ve thung.

Eng pawh chu ni se, Mizo TA avanga hmingṭha tur an awm a nih chuan hming ṭha mai se, mipui hi chu TA din a nih tak avangin lawm mai ila a ṭha. Mizo hlang awmna tur TA din a ni ta hi a lawmawm tak zet a ni.

Tuna Mizo TA-a lutte hi company pathum emaw chauh an ni a, an la tam lo. Battalion puitling la ni tura sawi a ni a, battalion ni tur chuan tuna lut tawhte aia tam fê lak belh a la ngai dawn. Battalion puitling neih thuai a nghahhlelhawm a, Mizo TA hi battalion puitling a nih thuai theih nan state sorkara thuneitute'n chak takin bawhzui zel se, battalion hmun nghet tur pawh tifel thuai se a duhawm.

CM-in TA lak leh turah chuan India/Mizoram khua leh tui dik takte chauh lak an nih theih nan an fimkhur tial tial dawn a, ration card phût a nih tawh dawn thu a sawi. TA lak tirh lamah Mizoram/India khua leh tui ni lo, document lem hmanga lut an awm nia an hriat thu a sawi bawk.

Mizo TA lak tawhah Mizoram/India khua leh tui ni lo lak tel an ni hi a zialo tak zet. Thuneitute fimkhur tâwk loh vang a ni berin a rinawm a; chutihrualin, miin thil dik lo tih an tum tlat chuan vên vek a harsa ve bawk.

Territorial Army lak leh hunah chuan India khua leh tui dik tak chauh lak an nih theih nan fimkhur chikima fimkhur a ngai dawn a, fimkhur ni mawlh rawh se. TA hi a ṭhat avangin, lak leh hunah chuan Mizo ṭhalai tam zawkin luh tum se a duhawm hle bawk.