Bawlhhlawh thliar dan thar inzirtir

UDPA Department chuan May 13, 2026 khan Planning depatrment conference hall-ah Solid Waste Management Rules, 2026 (SWMR) inhrilhfiahna hun an buatsaih. He Rules thar hi Mizoramah hman thuai a ni dawna sawi a ni.

SWMR 2026 ang chuan, bawlhhlawhte chu chi li - ṭawih thei, ṭawih thei lo, sanitary waste (diaper, santitary pad) leh special care waste (rawng bûr, damdawi bûr, etc)-a thliar hran tur a ni a; bawlhhlawh khawntute'n bawlhhlawhte chu bawlhhlawh neitute in kawt aṭangin an la khawm (door to door collection) dawna sawi a ni. Bawlhhlawh siam chhuak tam, kg 100 aia tam nei ṭhinte chu AMC-ah an inziah luh a ngai tawh dawna sawi a ni bawk.

Bawlhhlawhte hi a buaipuiawm em em a, a bikin khawpuiah buaipui a ngai em em; Aizawlah phei chuan bawlhhlawh paih leh sawngbawl hi hna lian tham tak a tling. Bawlhhlawh paih dan leh sawngbawl dan a dik loh chuan ram, khua leh veng a ṭawp ṭhin a, chuvangin, bawlhhlawh senghawi dan a pawimawh em em.

SWMR thar hi engtikah chiah nge a taka hman ṭan a nih dawn la sawi thei lo mah ila, kan la hmang ngei dawnin a lang. Chhungkaw tin nghawng a nih avangin mipui nâwlpuiin kan ngaihven a ṭul a, tun aṭangin rilru lama inbuatsaih a ṭul.

Aizawlah leh khaw dang eng emaw zatah chuan bawlhhlawhte thliar a lo ni tawh; kan thliar dan ber chu chi hnih - ṭawih thei leh ṭawih thei lo a ni ber. Ṭawih thei leh ṭawih thei loa thliar tur a ni chung hian, chhungkaw tam tak chuan an la thliar ṭha lo hle a, ṭhenkhat chuan awmze nei loah an ngai pawh a ni mai thei.

SWMR 2026 hman hunah phei chuan bawlhhlawh thliar dan tur a khirh lehzual a, sorkar leh mipui mawhphurhna a ni ve ve. He dan a hlawhtlin theih nan mipui kan pawimawh dawn a, mipuiin taima taka bawlhhlawhte a nih dan tur ang taka kan thliar a ṭul dawn a ni.

Mipuiin dan anga ṭha taka bawlhhlawh an thliar theih nan a ṭulna leh ṭhatna an hriat hmasak a ngai a; inzirtirna lamah tun aṭangin hmalak ni se, nasa taka inzirtir ni rawh se. Mipui rilru siam dik hmasa turin thuneitute'n hma an lak ran a ngai e.